Phalna nei lova petrol & diesel zawrh

“Mi tu mahin phalna nei lovin Aizawl district huam chhungah Petrol leh Diesel an zuarin an hralh tur a ni lo. He khapna thupek zawm lote chu an petrol man sak an nih bakah BNS Section 223 hmangin an chungah hremna lek a ni ang. He thupek hi chhuah a nih atangin thla hnih chhung a huam ang.”
He thupek hi nimina Aizawl District Magistrate tihchhuah a ni. Hetiang lam hawi deuh khapna thupek hi kum sawm chuang kal ta atang khan tihchhuah a lo ni tawh thin a. Phalna nei lova petrol & diesel zuarte pawh dan anga han man nawk nawk tawk te chu an awm ve bawk awm e. Mahse dan kengkawhtuten dan bawhchhia an awm leh awm loh hi an chhui zui urhsun em em ngai lem lo niin a lang.
Aizawl khawpui chhunga langsar taka ni tin dan bawhchhiatna hmun Mizofed filling station bul phei hi chu thupek chhuahtu thuneitute pisa atanga lung vawm phak leka hla a ni. Thupek chhuahtute pawhin dan kalha helai hmuna petrol leh diesel zuartute khawsak phung hi ni tin an hmu a, an hrechiang em em tawh bawk. 2019-ah phei kha chuan Mizofed filling station bula dan kalha tuialhthei zuartute pual liau liau hian khapna thupek tihchhuah a lo ni tawh nghe nghe. Helai bul hnaia dan kalha petrol zawrhna dawr tê atang hian kangmei a lo chhuak tawh bawk. Chuti chung pawh chuan dan kengkawhtute hian helai Mizofed filling station bulhnaia black-a tuialhthei zuartute hi an hnawtchhuak thei lo, tun thlengin.
Petrol a tlem tumin, coupon lo chuan an pe chhuak thei lova, petrol lak tuma filling station pantu, coupon nei si lote chuan to deuh zawkin a bul lawka black-a petrol zawrh chu an lei thin. Black-a petrol zuartute hian helai bulhnaia lirthei tlan tawh phawt chu an lo inchuh luai luai thin.
Helai bul hnaia hotel changkang zeta thleng mikhualte pawhin mak ti takin helai thil thlen dan hi an lo thlir dauh dauh thin. Thawkkhat lai phei kha chuan, sawrkar laipui atanga milian tak tak he hotel-ah hian an thleng dawn a, petrol blacker-te hi an hnawt darh tawh a ni awm e. Hetiang hi hmun dangah awm ve tak maw!
Kalphung thar hian kalphung hlui hi chhawm zel tak ang maw!? Aikal lak tihtawp aiin a harsa deuh dawn nge, mipuiin kan lo thlir leh dawn a nih hmel e.