PHE-in Tlawng nut chhan leivung paih vang tih sawi

PHE department chuan Aizawl khawpui chawmna atana an tui lakna ber Tlawng lui tui nut thin chhanah mipui lamin he lui fintu luite ah leivung an paih vang tih a pawm thu a sawi. PHE engineer in chief Zodinthari sawi danin, kumin fur tan tir khan Vaivakawn Zohnuaiah Greater Aizawl Water Supply Scheme Phase-III pipe line chu lei chein a tichhia a, he scheme atanga tui pump chhuah thin chu vawiin thlengin pump theih a ni rih lo.
Tlawng Reiek kai atanga GAWSS Phase-I & Phase-II atanga tui pump chhuah thin pawh ruah a sur apiangin tui tihfim theih loh khawpa a nut nasat thin avangin tui pump chhuah theih zat tur pump theih a ni thin lo bawk.
“Heti taka tui a nut chhan hi, Tlawng lui fintu luite ah mipuiin leivung kan paih avangte, kawng laihna leivung kan paih avang leh ramhnuai leimin vang a ni deuh ber. Tui nut san lai phei chuan NTU 1000 chuang a ni thin,” a ti.
NTU hi Nephelometric Turbidity Unit tihna a ni a; mihringin a in tlak nia ngaih chu NTU 5 aia sang lo a ni. Chu pawh a sang lamah hi chuan uluk taka in tlaka sawngbawl a nihin, tih a ni.
Heng hi tuna duh anga department-in tui a sem theih loh chhan a ni tih a sawi.
Aizawl khawpuiin nitin tui litre maktaduai (MLD) 38 a mamawh a, chutih laiin GAWSS Phase-I & II hian ni khatah MLD 25 – 28 inkar chauh tui an pump thei tih E-in-C hian a sawi a. Hei vang hian Aizawlah chawhrualin thla khat chhungin tui connection khatah vawi hnih-khat bak sem tur a awm thei lo, tiin, pawi an tih thu a sawi.
Phase-III pipe line Zohnuai ami chu siam mek niin, PWD-in kawng chhak lam leimin dawlna an siam ve mek a. Ruah a la sur fo avangin lei a la tawlh zel a, hmasawn a harsa viau tih a sawi. “Chuti chung chuan ngawrh takin PWD leh PHE in hma kan la mek zel a. November thla chhungin tui pump chhuah leh theih beisei a ni,” a ti.
PHE hotute chuan Aizawlah mimal tuizem leh pipe line atanga tui put ven hna an thawk a, tui leak report-na tur, Water Leak Report apps siamin, vawiin thlengin he application kaltlang hian tui leak report hmun 310 chuang atangin an dawng tawh tih an sawi a. A rang thei ang bera siamthat hna thawh nghal zel a ni tih an sawi.
Hei bakah hian mimal tui dahna tanga tui liam venna – ball float valve vuah tha an ti a, mipui hnena ngenna tih chhuah an tum mek tih an sawi bawk.