Philippine wildcard Eala dang zo la awm lo!

Miami khawpui Hard Rock Stadium-a Miami Open kal mekah Asian tleirawl ‘hot’ zet Alexandra Eala a inlar mek a; he Philippine kum 19 mi hian Nilainiah 6-2, 7-5-a Iga Swiatek hneh lehin, tun tournament chhung ringawt hian semi-final a luhna kawngah Grand Slam title la tawh pathum ngawt a pal thlu tling ta der mai!
Eala hian women’s draw-ah Australian Open champion Madison Keys leh 2017 French Open champion Jelena Ostapenko a lo hneh tawh a, world number two Swiatek em chu a hneh zo tawh lo ang a an tihsak mek laiin he Philippine wildcard mai mai hian a career la naupang taka a hnehna sualchhuah lian ber a nghakchhuak a, champion tura rinkai zinga mi Pole Swiatek lakah tournament kal laia inbarakhaihna lian dang a thlentir leh tlat!
Vawiin semi-final pakhat zawkah Eala hian Emma Raducanu kal tluang mar lai tihtawpsaktu tualchhung nula tantu ngah American fourth seed Jessica Pegula a hmachhawn zui leh dawn a, Miami khuaah thilmak dang a thleng leh dawn em kan thlir ang!
Inkhelh bana an kawmnaah Asian star lar ni chho ta hluai Alexandra Eala hian five-times Grand Slam champion Swiatek em chu a hneh zawh a inrin loh thu leh a idol-te zinga pakhat a paltlang leh thei ta mai chu amah pawhin mak a tih thu hahipin a sawi a, a inrinhlelh rum rum thu leh tun dinhmuna sawi tur ber pawh a hriat loh thu a sawi.
Nilaini men’s singles lamah France player Arthur Fils chuan rinkai zawk top seed Alexander Zverev lakah beisei loh takin 3-6, 6-3, 6-4 hnehna a chang ve nawlh bawk a; he rising Frenchman hian tunthla tir lama khelh Indian Wells-ah khan last eight a lo thlen tawh bawk avangin a career-ah a zawnin tum hnih Masters 1000 tournament quarter-final a lut tling ta a ni.
German khan sang Zverev khan harsatna lian tawk eih loin 17th-seeded Fils lakah set khatna a la mai a, mahse, set hnihna leh set thumnaah mak takin a talbuai ta tlat a, kum 20 mi Fils chuan a career-a hnehna lian changin, quarter-final match pakhatah amah aia kum khata naupang Jakub Mensik of Czech Republic a hmachhawn leh ang.
Last eight match pakhatah darkar hnih leh minute 47 zet chhungin Grigor Dimitrov chuan Argentine Francisco Cerundolo lakah 6-7(6), 6-4, 7-6(3) hnehna a chang hram a, 14th-seeded Bulgarian Dimitrov hian semi-final match pakhat zawkah nizana chak zawk hriat hman loh 24-times Grand Slam champion Novak Djokovic leh American Sebastian Korda inkhela dingchang zawk zawk a tum leh dawn a ni.