Philippine court chuan journalist Maria Ressa chu tax evasion thubuaiah thiam a chantir a, hei hi press freedom-in chakna a channa anga ngaih a ni.
-- Advertisement --
“Vawiin hian thudik a chak a, thil dikin hnehna changin, justice a dingchang bawk,” tiin Ressa chuan a sawi a, thiam loh chantir ni se chuan kum 34 lung in tang hial thei tur a ni.
Nobel laureate-in chakna a channa case hi kum 2018 atanga ngaihtuah tan tawh kha a ni a. Ressa hi Rappler dintu niin Philippine sorkar chuan a chhui nasa hle a ni.
Philippine leader hlui Rodrigo Duterta sorkar khan Ressa leh Rappler te chu foreign investor tean sum an pek atangin chhiah pek awl ru-ah an puh a.
Philippines’ justice department te chuan Rappler ten Philippines Depository Receipts hmanga Omidyar Network leh North Base Media kaltlanga sum an dawn atanga an chhiah pek tur chu 141.86 millin pesos a ni an ti a ni.
Ressa leh Rappler te chuan engmah tih dik loh an neih loh thu sawi thungin dan ang thlapin engkim an kalpui an ti ve thung.
Philippines’ Court of Tax Appeals te chuan prosecutors te chuan finfiahna chiang fak an nei thei lo tiin hei vang hian Ressa leh Rappler te chu thiam a chantir ta a ni.
Ressea chuan court thutlukna siama a chakna chu ‘Philipino tin te dik lo taka puh te tana hnehna a ni’ tiin a sawi a.
“Min puhnate hi politics thila an kalpui a ni a, thuneihna hman sualna niin journalist te an tihtur khaihlak tir tumna a ni,” tiin a sawi.
Philippines sorkar chuan a hma pawhin Rappler chu tihtawp tumin a bei tawh thin a, a chhan ber pawh Duterte sorkar an sawisel nasat thin vang a ni a, Duterte sorkarin an haw hle a, Ressa hi a hma pawhin thil dangah thubuai siamsak niin kum ruk lung in tang tura tih a lo ni tawh a, mahse, bail-a chhuah a ni zui thung.