Philippines president-in China vau

Philippine President Ferdinand Marcos Jr chuan China chu South China Sea ah ‘red-line’ pel lo turin a hriattir a, ram pahnih te tuipui ramria an inbakkaihna a nasa tial tial a ni.
China chet dan avanga Filipino nunna chan an awm a nih chaun Phillippines chuan ‘indona thil’ anga ngaiin a chhang let nghal ang tiin a sawi.
Heng thu te hi Marcos hian Singapore a security forum khawvel ram hrang hrang defence chiefs te fuankhawmna neihnaa a sawi niin US defence chief Lloyd Austin pawh a tel ve a ni.
Helai region hi Washington ngaih pawimawh ber a ni tibawkin Asia a him chauhin US a him tiin a sawi bawk.
Tun hnaiah China leh Philippines tena South China Sea a tuipui ram an inchuhna chu tharthawh nasat niin buaina tenau a thleng deuh reng a ni.
Chinese patrol ship te chuan Philippine lawng leh supply vessels te chu water cannon in an kap thin a, chuvang chuan manila a lawm lo hle.
Beijing thung chuan a sovereignty humhim nana a hmalakna a ni a ti a. Summit neihnaah hian Chinese military spokesman chuan Phillippines chu buaina chawhchhuah tum tiin a puh nghe nghe.
South China Sea ah buaina a awm a nih chaun Chinese leh Americans te inbeihna a thleng ang tia sawi a ni bawk a. Philippine sin beih a tawk a nih chuan inremna ram pahnihin an siam dun angin US chuan a pui lo thi dawn lo a ni.
US pawhin chaing takin helai region-a a thawhpui ram te chu a chhan tur thu sawiin tun hma aia inzawmna tha zawk siamin thla kalta pawh khan Philippines leh Japan nn summit an nei bawk.
“Filipino pakhat pawhin nunna a chan chuan sipai kher ni lo khua leh tui in nunna a chan a nih chuan chu chu indona puanna anga kan ngaih a ni dawn a, chhanglet turin ruahmanna kan siam nghal ang a. Kan thawhpui ram te pawhin min thlawp zui nghal ang” tiin Marcos Jr chuan a sawi.
Tun hnaia Chinese chetna avangin hliam an awm tawh thu sawiin mahse nunna chan an la awm lo a ti bawk a.
US Secretary of Defense Lloyd Austin pawhin China avanga Phillippines in nghaisak a tawrhna chu a hlauhawm lutuk tiin a sawi bawk a. US chuan Phillippines chu a thlawp bur zel dawn tiin a sawi bawk.
Mahse inbiakna neih leh freedom of navigation kenkawh chu an thupui ber a nih thu sawiin, “Kan tum ber chu tul lova buaina nasa zawka a irhchhuah dan a ni” tia sawiin, “ka ngaihdan chuan China nena indo hi tihmakmawh emaw pumpelhtheihloh a nihna ka hre lo” tiin a sawi bawk.
US chuan Indo-Pacific region himzawka siam chu a mawhphurhnaah a ngaih thu leh Ukraine indona leh Gaza buaina awm reng lai pawhin an ngaih pawimawh ber zawk a ni tiin a sawi bawk.
US chuan tun hnaiah ralthuam that tak tak hmangin Philppines military a pui nasa hle a. Defence roadmap siamin chumi hmang chuan US chuan drone, military transport aircraft leh defence system te chu Philippines hnenah a pe tawh a. Philippines chuan India atangin missiles a lei bawk.
Shangri-La summit neihnaah hian Chinese military aiawh te chuan Philippines chu ram pawn lama tena an thlawpna avangin a huaisar tia sawiin chuvang chuan Second Thomas Shoal (tuipui ram inchuh) ah huaisar takin chet a la zawk a ni a ti.
China chuan US in Philippines hnena tun hnaia joint military exercise neihnaa mid-range missile system a pe chu helai regional security atana hlauhawm tiin a sawi bawk.
Chinese military spokesman chuan US strategy chuan helai region ah ngelnghehlohna leh inngurna nasa zawk a thlen dawn tia sawi bawkin South East Asian ram te chu inbiakna hmanga China nena an harsatna te chinfel tum zawk turin a ti bawk.
Austin leh Dong chuan inbiakna nei zuiin US House Speaker Nancy Pelosi in kum 2022 a Taiwan a tlawh hnua US leh China military commander tena telephone hmanga inbiakna an siam hotline chu tharthawh leh ni se an ti bawk a.
“Dong hnenah min bia a nih chuan ka chhang ngei ang che a, phone ka la ang ka ti a, amah pawhin a tih ve ngei ka beisei” tiin Austin chuan a sawi zui bawk.