Tunlaiin Phuldungsei khaw ram chhunga Thaidawr tlang velah Tripura sorkarin hna a thawk a, Phuldungsei-a Zofate mit a kham hle tih thu dawn a ni. Mizoramin Village Council (VC) a dinna Phuldungsei khuaah hian chhuah lam chu Mizoram tia sawi thin a ni a, chumi huam chhunga awm Thaidawr tlang-ah tun hnaiah Tripura sorkarin hna a thawk a ni.
Zampui tlang atanga thu dawn danin, Tripura sorkara tourism department bultumin hna hi an thawk a, a taka thawktu chu Tripura sorkara forest department an ni.
Tourism department hian kum thum vel liam taah khan Thaidawr tlang hi chei tumin an thawk tan a, forest department-in an pawm loh (object) avangin hna hi chawlh leh rih niin, kum hnih vel liam hnuah tourism department chuan forest department hnenah sum senso tur (fund) hlan chhawn a ni a, chawlhkar thum vel liam ta atang khan hna hi an chhunzawm ta a ni.
“Thaidawr tlang panna kawngah solar street light an siam tawh a, a tlangah bungrua an chhek tawh a, in te pawh an sa tawh a. Mizoram sorkar a ngawi rih tlat mai hi pawi kan ti khawp mai,” tiin Phuldungsei pa pakhat chuan The Aizawl Post a hrilh.
He tlang chhehvela huante pawh Mizote ta a nih thu Phuldungsei khaw mite chuan an sawi a, nikum lam khan thlam thiahtir an lo awm tawh a, tunah pawh Mizote huana thingpui dawr siam tumna a awm tih an sawi bawk.
Mizoram sorkarah ziaka an thlen tawh thu an sawi a, chawlhkar hnih vel liam hnuah pawh chhanna an la dawng lo tih an sawi.
Thaidawr tlang leh a chhehvel chu Mizoram leh Tripura te ram inchuh a ni tih an pawm thu an sawi a, thuziak hluia a lan danin Mizote ta, Mizoram huam chhunga mi tur tih a chiang a, chu chu Tripura lam pawhin an hnial ngam lo tih an sawi. Chuti chung chuan Tripura hian an chuh reng tih chu Phuldungsei leh Zampui tlanga Zofate sawi dan a ni.
Phuldungsei ram chhungah Tripura sorkarin hna thawk
Get real time updates directly on you device, subscribe now.