PIB bultumin Kashmir-ah MJA kal

Press Information Bureau buatsaiha Kashmir ramchhung hmun hrang hrang tlawh tur Mizoram Journalists’ Association member-te chu Pathianni khan Regional News Unit DDK director Nampibou Marinmai chuan a vailiam.
PIB Press Tour-a kalte hi Pathianni chawhma khan PIB Aizawl office Tuikhuahtlang atangin vailiam an ni a. RNU director chuan rambung khatah cheng mah ila, kan hnam ziarang kan kalphung hrang hrang a inan loh thin avangin inhriatpawh tawn a pawimawh a, tuna MJA member kalte pawh hian an ram tlawh turah hlawkna tha tak an hmuhchhuah a, press tour chu inzirzauna atan leh ram tana hlawkna hawn theia hmang turin a chah
PIB Press Tour-a kalte hi PIB Aizawl head of office Rajeev Lourembam leh RNU DDK assistant director Annuj Mallick ten hruaiin, MJA hi an president C Lalrambuatsaiha hoin member mi 13 an kal a ni. Ni 7 chhung an thang anga, PIB Srinagar ruahmanin Jammu & Kashmir hmun hrang hrang an tlawh dawn a ni. February 22-ah Aizawl an rawn let leh ang.
Hetihlai hian I&PR department buatsaiha press tour neiha tel MJA member-te chu Mizoram MP-ten an lo dawngsawng a. Rajya Sabha MP K Vanlalvena ruahman sak angin India President chenna – Rashtrapati Bhavan leh hemi chhunga museum an tlawh a, Parliament House building thar leh hlui an tlawh bawk. Lok Sabha MP Richard Vanlalhmangaiha’n zanriah a lo buatsaih sak bawk.
MJA member-te zawhna chhangin MP K Vanlalvena chuan, Lengpui ram lei chungchanga India President, Prime minister leh Home minister hnena ziaka a thehluh tawh chu chhanna a nghak mek a. Hemi chungchang hi House-ah zero hour-ah sawi a tum a, hun erawh a la nei thei lo tih a hrilh a ni.
MP Richard Vanlalhmangaiha an zawhnaah, Lengpui ram lei kaihhnawihah hian Defence ministry lamah ziakin ram lei a nih dan bakah zawhna hrang hrang a thehlut a, chhan a nih thuai a beisei tih a sawi a ni.