Pisa leh zirna in kai tur dan tum

Govt. Champhai College-a zirtirtu indaihlohna avanga hma an lak meknaah Champhai MZP chuan an beisei ang chhanna an hmuh theih loh avangin, an lo sawilawk tawh angin vawiin – August 5 atang hian sawrkar pisa kai tur leh zirna in kai tur dan tel an tum.
MZP Hqrs. Champhai hmalakna in August 2 (Zirtawpni) khan zirtirtu ngiat hian Govt. Champhai College-a thawktute leh zirlai class kal tur an lo dang tawh a. August 3 khan sawrkar aiawhte nen inbia in, sawrkar lam harsatna leh an tum dan hrilhhriat an nih hnu ah, tun maiah chuan zirtirtu pek theih an nih loh thu hrilh an ni a. College-in zirtirtu an mamawh tawh dan ngaihtuah a nih hnu ah MZP chuan zirtirtu hnawhkhah hi thil theih nia a hriat avangin, sawrkar ngenna zahawm a tih rualin, an lo rel lawk tawh angin lungawilohna lantir chhunzawm nan vawiin atang hian Champhaia zirna in zawng zawng leh sawrk ar pisa kai tur dan an tum chu kaltlangpui a tum a. Hei hian bank leh hospital OPD erawh a huam ve lo a ni.
Tarlan tawh angin, Champhai MZP hian Govt. Champhai College-ah hian department thenkhatah zirtirtu dah belh mah se, thenkhatah indaih lo takin an awm a. An in affiliate-na MZU ordinance-ah department pakhatah zirtirtu 4 tal awm tura tih a nih laiin Political Science leh Economics department-ah zirtirtu pathum chauh an awm a. New Education Policy system hman a nih hnuah phei chuan zirtirtu indaih lohna hi a nasa zual hle nia sawiin, NAAC accrediation an hmachhawn turah zirtirtu indaih lohna department avang hian grade tha hmuh theihna kawngah nasa takin a tlahniam thei tih an sawi. Zirtirtu indaihlohna hi hun rei tawh tak atang khan an buaipui tawh a, an beisei ang chhanna an la dawng ngai lo tih an sawi a ni.