Plastic bawlhhlawh paih zat endik

Lunglei Municipal Council (LMC) huamchhunga bawlhhlawh tawih thei lo paih zinga plastic lam chi awm zat leh a chi hrang dinhmun chu Nilaini atang khan endika zirchian tan a ni.
LMC huamchhunga bawlhhlawh paih zirchian leh endik hna hi executive councillor pahnih – Zorinsanga Hmar leh Lalhruaitluangi Sailo te uapna hnuaiah LMC secretary Lalrinawma hoa kalpui a ni a. Riangvaite Thlanmuala Lunglei khawpui bawlhhlawh paihna hmunah kalchilhin, LMC huamchhunga bawlhhlawh tawih thei lo paih zingah plastic eng zat nge awm tih leh, eng plastic chi nge hman a nih tih enfiah a ni. He zirchianna hi July 29 thleng kalpui tum a ni.
Kum tina plastic waste annual report thehluh thin chu zirchianna mumal a awm lo nia a lan bakah vawikhat lek hman chi sarang (single use plastic) thenkhat hman khap a nih tak avanginm sawrkar laipuia Ministry of Environment, Forests & Climate Change chuan Solid Waste Management Rules a siamtha a. He dan thar kalpui tur hian Central Pollution Control Board chuan standard operating procedure (SOP) duangin, Mizoramah pawh kalpui a ni.
He SOP zulzui hian tunah urban local body pahnih – Aizawl Municipal Corporation leh Lunglei Municipal Council bakah village council/ gram panchayat thlan bikah bawlhhlawh atanga plastic hman dan hi endik mek a ni.