Plastic Pollution leh Mizoram

Plastic bawlhhlawhin kan tui tlan lai leh kan ram leilung a tih bawlhhlawha a tihchhiat dan te kan hmuin kan hre vek a. Hman khat daih plastic khap a nih dan te, polythene bag pan chi khap a nih dan te kan hria a. Abikin Aizawlah chuan khawpui enkawltu AMC-in Plastic Free Aizawl tihte pawh a puang a, polythene bag zawrh leh hman khapna dan te pawh kenkawh niin dan bawhchhiate pawh engemawzat man an ni bawk a; mahse, dan kenkawh mar pat a nih loh vang nge, tunah chuan polythene bag khapna khan awmzia a nei zui leh vak tawh lo.
Tun tum World Environment Day thupuiah pawh “Ending Plastic Pollution” tih hman a ni a. Kum 2018-a India-in WED a thlen tum khan “Beat Plastic Pollution” tih hman a lo ni tawh bawk. Khawvelin environment tichhetu pollution zinga a ngaih pawimawh leh a helh ber chu plastic pollution hi a ni a. Khawvel huapa kum tina plastic bawlhhlawh tlingkhawm hi tonne maktaduai 400 vel a ni a, recycle chu 9% chauh a ni.
Han chhut ila, kum tin plastic maktaduai 400 siam chhuah atanga za zela 9 (9%) chauh recycle a nih chuan, khawmual leh tuipui hi plastic bawlhhlawhin a hnawh khat thuai dawn tihna a ni awm e.
Bangladesh ram hi khawvela plastic khap hmasa ber ram a ni a. A tirah chuan awmzia a han nei viau dawn a, mahse a rei telh telh a, awmzia a nei tam leh tawh lo hle. Hei hi a chhan tam tak a awm a, mahse chung zinga langsar tak pakhat chu ‘law enforcement’ lam a mar pat thei lo, tih a ni; illegal factory tam tak a lo piang leh a, market monitoring kalpui zui a nih bawk si loh avangin a nih tur angin an thatpui tak tak lo a ni.
Mizoram nen pawh kan inang viau awm e. Thawkkhat lai kha kan han ti hluai a, dan bawhchhetute pawh kan han inman khawm ve rap rap a, mahse tunah chuan a tir lama hmalakna ang kha hmuh zui tur a awm leh tawh mang lo.
Eng pawh ni se, environment day te hi kan la hmang chho zel dawn a nih chuan, zirlaiteah hian awareness campaign hi ngawrh taka kalpui ni se; sawrkar deptt hrang hrangte pawh hian plastic hnualsuat kawngah tun aia urhsun zawk hian hma han la thei se, awmzia a nei ngei ang.