Plastic um leikhawm sak

Plastic um leikhawm sak
Selesih Local Council hnuaia Local Level Sanitation Committee leh NGO tangho chuan vantlang hnatlang leh khawlaia plastic um paih an leikhawm sa an tiral.
Selesih hi AMC Ward No.1 huamchhunga awm niin, nikuma faina kawnga AMC ward intihsiaka pakhatna latute zing ami an ni a. Kuminah pawh ward fai ber dinhmun hum tumin theihtawpin faina kawngah hma an la a, Local Level Sanitation Committee huaihawtin YMA, MHIP leh MUP nen an thawkho a, vantlang hnatlang leh khawlaia plastic um paih an leikhawm sa chu tihral a ni.
Hmanpuitu Aizawl mayor Lalrinenga Sailo chuan faina leh thianghlimna kawngah Aizawl khawpuiin hma a sawn em em a, AMC chauh ni loin UD&PA department, Aizawl Smart City Ltd leh Central YMA nen bawhhlawh (solid waste) senghawi leh sawngbawl kawngah thawhhona thuthlung ziakin, Aizawl faina atan hma lak a ni a, fai intihsiak buatsaih a ni dawn tih a sawi.
YMA leh NGO dangten faina kawnga AMC hmalakna tha taka an tawiawm thin avangin mayor hian lawmthu a sawi a. Plastic um leh polythene leikhawm chu suma chantir duh vang niloin, khawtlang leh naupang inzirtirna tura leikhawm a ni a, leikhawm tur awm tawh lo se an duhthusam a ni zawk tih a sawi.
AMC executive corporator i/c Sanitation & Solid Waste Mangement Laltlanzova Khiangte chuan, AMC-in nitin lirthei trip 160 chuang bawlhhlawh a khawn khawm a, veng 20 velah in tina bawlhhlawh khawn ‘door to door collection’ a kalpui tan bawk a, sarang tel loa bawlhhlawh tawih thei khawn a buaipui tan bawk a, leitha a siam chhuak hial tawh tih a sawi a ni.