Football club hrang hrangin an duh zawng player lak luh tumin hma an la a, player tha pawh an inchuh nasa viau thin. Sum tam tak sengin player an la lut zut zut a, player hlawh leh thil dangah an inseng nasa viau thin bawk. Sum tam tak sena an lak luh player, beiseina sang tak nena an thlir lak luh duh loh tam tak an awm a. Lak luh fuh tak takte pawh an awm teuh bawk. Tun tumah hian kum zabi 21 chhunga player lak luh fuh zual goal.com in a tarlante kan tar lang ang.
1. Cristiano Ronaldo
Footballer ropui ber ang hiala ngaih ni ta hial Cristiano Ronaldo hi English Premier League club lian Manchester United chuan kum 2003 khan Sporting Lisbon atangin an la lut a. Ronaldo manah hian £12m lek an seng. 2003-2004 season tan hmain United leh Sporting Lisbon te hian friendly match an khel. Heta an intum tum hian Sporting Lisbon rawlthar Cristiano Ronaldo hi a khel tha hle a, United senior player ten an pu Sir Alex Ferguson hnenah la lut turin an ngen hial. United in Ronaldo an lak luh dan thawnthu pawh hi a ngaihnawm hranpa ve hrim hrim.
Beiseina sang tak nena an lak luh Ronaldo hi United in an la lut fuh cher cher hle. United tan a khelh hmasak zawk chhungin inelna hrang hrangah vawi 292 a khel a, goal 118 zet a thun. United hi EPL-ah vawi thum a champion pui a, Champions League, FIFA Club World Cup, FA Cup leh League Cup-ah te a champion pui bawk. United hlawhtlinna a chanpui ang bawkin mimal chawimawina pawh a hui nual bawk. England tualchhunga chawimawina hrang hrang a dawn bakah kum 2008 khan Ballon d’Or a dawng hial a ni. United player zingah Ballon d’Or dawng hmasa ber a nih bakah EPL player zingah FIFA World Player of the Year a thlan hmasak ber a ni tel bawk.
United in C Ronaldo lak nan £12m lek an seng a, Ronaldo-a’n United a pek let erawh chu tam tak a ni.
2. Jamie Vardy
Leicester City nena inhmeh em em tawh Jamie Vardy hian kum 25 a nih thlengin EPL leh Championship a khel phak lo hial. Kum 25 a tlin hnuin championship a khel ve ta nawlh. Kum 2011 khan Leicester City chuan Vardy hi an la lut a, a manah £1.7m lek an seng. Leicester City tan hian inelna hrang hrangh vawi 471 khelin, goal 192 a thun tawh. Foxes hi kum 2015-16 khan EPL-ah mak tak maiin a champion pui hial a. He season ah hian Premier League Player of the Season leh FWA Footballer of the Year-ah thlan a ni hial nghe nghe.
Leicester City hi EPL leh FA Cup-a champion pui bakah 2019–20 season khan EPL top-scorer a ni hial nghe nghe. Leicester City tan a rinawm bakah thahnem a ngaih theih em vang leh hlawhtlinna sang tak a chanpui bawk vangin Vardy hi Mr. Leicester City an ti hial a ni.
3. Samuel Eto’o
2009-2010 season tan hmain kha tih laia forward tha ber zinga mi Zlatan Ibrahimovic chuan Inter Milan a chhuahsan a. Hlawhtlinna sang zawk chan duhin FC Barcelona a zawm. Ibrahimovic hian Barcelona-ah Samuel Eto a luahlan a, Eto hian Ibrahimovic chhuahsan Inter Milan a zawm ve thung. Inter Milan hian Eto manah £38.5m an seng.
Cameroon forward Eto hian Inter Milan tan kum hnih chauh a khel a, inelna hrang hrangah vawi 102 khelin goal 53 a thun hman. Inter Milan tan khel rei lo mah se hlawhtlinna sang tak erawh a chang hman a, a season khatnaah trophy lian pathum lakpuiin tre-ble champion a nihpui nghal der. 2009-10 season ah hian Serie A, Coppa Italia, UEFA Champions leh FIFA Club World Cup-ahte a champion pui. Inter Milan hian Eto lak nan sum seng tam lo mah se Eto vanga trophy an lak erawh a hlu a, a man a tam viau thung.
Eto-a’n inelna lian pathuma Inter Milan a champion pui laiin Champions League-ah champion chak vanga Barcelona pana chhuak Zlatan Ibrahimovic erawh chu a champion chakna em em UCL-ah a champion lo a ni mai lova, a team hlui Inter Milan in UCL trophy an chawi lai chu chilthli ta duah duahin a lo thlir ve thung.
4. N’Golo Kante
Player taima, thawkrim em em lai N’Golo Kante hi Leicester in £5.6m chauh sengin an la lut a. EPL-ah an champion hnuin Chelsea hnenah £32m zetin an hralh a, an hlep tha mai mai. Season khat chauh an kawl chhungin EPL-ah a la champion pui zui.
Kante hi kha tihlaia Leicester City manager Claudio Ranieri khan a’n duh mai mai khawp a, ‘Kante hi mualchhung khawi hmun pawh dap chhuak vek khawpa player daihzai, player pathum hen a ni” ti hialin a fak. EPL a an champion theih nana an thawhhlawk tak Kante hi Chelsea hnenah an hralh a, Kante manah hian Foxes in £26.4m ngawt an hlep.
5. Riyad Mahrez
Leicester City hian player lak luh an thiam ngang ni tur a ni a, tlawm taka an lak luh ten hlawhtlinna an chanpui te te a. Tlawmtea an lak luhte kha man to takin an hralh leh mai thin. Player lak luh fuh zual kan tarlan top 5-ah pawh Leicester City in an lak luh pathum ngawt an tel ta hial mai. Foxes in Mahrez an lak luhna hi awihawm loh khawp a tlem; £450,000 chauh zu nia mawle.
Leicester City hian Riyad Mahrez hi kum 2014 khan Le Havre atangin an la lut. Foxes tan hian inelna hrang hrangah vawi 179 a khel a, goal 48 a thun. Leicester City hi 2015-16 khan EPL-ah a champion pui nghe nghe. Kum 2018 nipui bazar inhawn lai khan EPL club lian leh hausa zawk Manchester City in an lei a, City in an leina zat hi £60m zet a ni a. Foxes in a lak luh nan £450,000 let an seng a. An hralh lehna erawh £60m zet a ni ta hem mai thung. Mahrez hian Leicester City tan a khelh chhungin PFA Player of the Season the year chawimawina a dawng nghe nghe.
6. Kaka
Italian club lian AC Milan chuan kum 2003 khan Brazil rawlthar Kaka chu Sao Paulo atangin an la lut a, amanah £7.1m chauh an seng.
Man tlawm taka an lak luh Kaka hi AC Milan tan a vul ta hle a, Serie A: 2003–04, Supercoppa Italiana: 2004, UEFA Champions League: 2006–07, UEFA Super Cup: 2007 leh FIFA Club World Cup: 2007-ah an champion theih nan a thawhhlawk hle. Milan tan a khelh chhung hian Ballon d’Or leh FIFA World Player of the Year chawimawina a dawng hial nghe nghe.
AC Milan tan vawi 270 khela goal 95 a thun hnuin kum 2009 khan khawvela football club hausa leh hlawhtling ber Real Madrid a zawm. Real Madrid hian Kaka manah €68.5 million zet an seng a, AC Milan in an hlep tha elh awlh hle.
7. Giorgio Chiellini
Juventus ti Juventus lehzual a, Juventus nena inhmeh em em mai Giorgio Chiellini hi Juventus chuan 2005 khan an la lut a, a manah £6.1m an seng. Turin club lian tan hian kum 18 chhungin vawi 561 a khel a, defender ni chungin chawl 36 a thun. Italian Serie A-ah vawi kua ngawt an champion a. Champions League final vawi hnih khel bawk mah se vanduai zawkah an tang ve ve thung. A hun laiin defender tha ber pawl a ni reng a, Juventus tlarhnung ban rinawm a ni.
8. Dani Carvajal
La Liga club lian Real Madrid chuan an hnen atanga inzirchhuak Dani Carvajal hi kum 2012 khan German club Bayer Levekusen hnenah an hralh a, kum 2013-ah £5.4m sengin an la lut leh nghal. Tun thlengin Carvajal hi Real Madrid player rinawm leh tangkai a la ni reng a. Tunah phei chuan an captain a ni ta hial nghe nghe a ni.
Dani Carvajal hian La Liga trophy pali ngawt a lak tawh bakah Champions League tophy paruk ngawt a chawi tawh bawk.
9. Toni Kroos
Midfielder tha sawi chang apianga sawi tel ngai thin Toni Kroos hi Bayern Munich in a hlutzia an hre tawk lova, hlawh tam tak pek an huam lo. Hlawh sang hlawhtir an huam loh vangin a chhuah an phal a. Europe a club lian Manchester United leh (Real Madrid ten an inchuh nghal var. Real Madrid hian £25m lek sengin kum 2024 khan an la lut. Santiago Bernabeu-ah Kroos an phochhuah tumin mipui 8,000 chauh inlan mah se 2024-a an thlah liam meuh chuan club legend a ni a ni chiang viau thung.
Midfielder fing, gool ruih mai Kroos hian Real Madrid tan kum 10 a khelh chhungin inelna hrang hrangah vawi 465 a khel a, goal 28 a thun. Real Madrid hi La Liga-ah vawi li a champion pui a. UEFA Champions League-ah vawi nga zet a champion pui a, Fifa Club World Cup-ah vawi nga a champion pui bawk. Real Madrid-ah a inchher hriam hnuin Germany chu World Cup-ah a champion pui bawk.
10. Nemanja Vidic
EPL club lian Manchester United chuan kum 2006 khan Spartak Moscow atangin defender Nemanja Vidic chu £7m lek sengin an la lut. Serbia pa huaisen Vidic manah seng tam lo mah se an chhawr tangkai ta viau thung a, an tlarhnung ban rinawm a ni. Vidic hian United tan inelna hrang hrangah vawi 300 a khel a, goal 21 lai a thun. United hi EPL-ah vawi nga ngawt a champion pui a. Champions League-ah vawi khat a champion pui bawk.
Player lak luh fuh zual 10 te
Get real time updates directly on you device, subscribe now.
Prev Post