Player lut leh chhuak \henkhat thlirna

Player lut leh chhuak thenkhat thlirna
Nipui thawt chhung atana player insuan theih hun chu khar a ni ta a, player thenkhat lut leh chhuak thlir teh ang.
Romelu Lukaku
Chelsea chuan AS Roma lamah loan-in an mihang striker hi an chhuahtir a, Belgian hian Italian Serie A-ah season khat hun a hmang phawt ang.
Kum 2021-22 chhung khan Lukaku hian BLues tan match 44-ah goal 15 thunin, chuti zatah game-ah chuan tum 29 chiah a tir atangin a lut a; season liamta mai kha loan-a a khelhna Serie A club dang Inter Milan atanga London-a a kirleh hun ni mah se Italy leilungah bawk an chhuahtir leh a, tuntum chu Champions League final a thlenpui Inter lo lamah a kal ta zawk a ni.
Kum 30 mi Belgian pawh hi Saudi club lamin sum itawm tham hlawh turin an sawm a, Europe lama la khawsak rih a thlang ta zawk niin media lamin an tarlang.
Roma-ah hian a pu hlui Jose Mourinho nen an inkawp leh dawn a, a hlawh tihhniam a remti nia hriat a ni bawk.
Mourinho hnuaiah Lukaku hian kum 2013-14 khan khel zawk tawhin, chu chu Chelsea-a player luh vawikhatna kha a ni a; a hnuah Portuguese hian kum 2017 khan Everton atangin Manchester United-ah a hruailut leh a, khatih laia a man kha pound maktaduai 75 zet a ni nghe nghe.
Kum 2019-ah Inter Milan-in pound maktaduai 74-in an lei chhuak a; kum 2021-a Chelsea-a a kirleh chuan a man pawh pound maktaduai 97.5-ah a kai chho dawrh tawh a, mahse, Stamford Bridge club-ah a hlawhtling ta lo hle a, May 2022 atang khan tuna loan-a a chhuah thleng hian west London club tan a la khel leh ta lo!
Lukaku hi tunhmain Belgian championship-ah Anderlecht thuam inbel chungin a lo champion tawh a; Chelsea tan FA Cup leh Club World Cup bakah Inter vuan chungin Scudetto, Italian Cup leh Italian Super Cup a lo sualchhuak tawh bawk.
Altay Bayindir
Manchester United chuan Fenerbahce atangin goalkeeper Altay Bayindir an senglut a, a man hi pound maktaduai 4.3 niin, Erik ten Hag hnuaiah Andre Onana nen number one hmun an inchuh dawn a ni.
Kum 25 mi hian Turkey tan tum nga goal veng tawhin, Old Trafford club hian kum li daih inremna an ziahpui.
Season liamtaa Fenerbahce-in Turkish Cup an lakna leh Super Lig-a pahnihna an luah kawngah Bayindir hi player pawimawh ni phain, English club ropuiin rintlakah an ngai zui ta hial a ni.
Bayindir an sengluh hmain goalkeeper Dean Henderson chu Crystal Palace lamah pound mak-taduai 20-in an hralhchhuak a; kum 12 zet an chhawr hnuah season liamtaa United first-choice keeper David de Gea pawh nipui thawt tantirh lai khan a chhuak fel tawh a; chutih laiin Cameroon goal-veng Andre Onana chu Inter Milan atangin pound maktaduai 47.2-in an senglut tawh bawk.
Keeper an lakluh thar ber Bayindir hian match 166 a ven tawhah tum 53 a chhuah lo.
Alex Iwobi
Everton midfielder hian Fulham zawm turin medical a paltlang tawh a, he thu buatsaih lai hian a man atana club pahnih inremna hmuh tur a la awm mai lo.
Nigerian Iwobi hian kum 2019 khan Arsenal atangin Everton a pan a, kum li chhung khan game 123 khelhah league goal vawiruk thunin, tunah kum 27 mi a ni.
Tun season kal laiah Everton tan Premier League game thum khel tawhin, heti zatah hian Toffees chu point khat chiah a la hmuhpui a, table mawngphah an luah mek.
Inrinnia Wolves an hneh loh leh tum khan hliam avangin a inlan thei lo.
Matheus Nunes
Portugal midfielder Matheus Nunes chuan Sporting Lisbon atanga club-record (£38m) siama Wolves a zawm hnuin tualchhung leh Europe champion Manchester City it khawpin khelmualah hun a hmang a, Etihad club chuan pound maktaduai 53-in an leichhuak.
Kum 25-a upa Portugal international hian ram tan pawh match 11 khel ve tawhin, City-ah hian kum nga daih contract a ziak.
Cole Palmer
Chelsea chuan Manchester City atangin England Under-21 forward Cole Palmer an lei chhuak a, a man hi la pung chho leh thei tur zawnga dah niin, sum hmahruaiah pound maktaduai 40 an phawrh phawt.
Kum 21 mi hian kum sarih daih tur inremna a ziah bakah pawl pahnih remtihtlannaa kum khat dang pawhsei theih turin an bilh tel bawk.
Palmer hian Uefa Super Cup-a Sevilla an hneh tum leh Community Shield-a Arsenal an ngam lohna match-ah khan City tan goal a khung ve ve.
Ryan Gravenberch
Transfer tukverh khar hma khan Liverpool chuan pound maktaduai 34.3 (40m euros)-a Netherlands midfielder lei turin Bayern Munich nen inremna an siam fel hman.
Kum 21 mi Dutchman hian nikum nipui lai khan German champion hi Ajax atangin a zawm a; Germany ramah first-team football khel pha loin tun season kal laiah pawh bench atangin vawikhat chiah a la lut a, beiseina thar nen England-a a vanneihna enchhin that leh a thlang ta zawk a ni.
Zirtawpni transfer deadline thlen hma khan Reds hian kumin nipui thawt chhungin Alexis Mac Allister, Dominik Szoboszlai leh Wataru Endo-te chu an midfield thuamchak turin an lo hruailut tawh bawk.
Chutih laiin midfielder pawimawh pahnih Jordan Henderson leh Fabinho chuan Anfield chhuahsanin Saudi Arabian club lam an lo pan fel tawh a; James Milner, Naby Keita leh Alex Oxlade-Chamberlain-te pawh free transfer-in an kalbo tawh bawk.
Box-to-box midfielder an tih ang chi Gravenberch hi Ajax academy pum chhuak niin, September 2018 khan PSV Eindhoven lakah Ajax tana a debut khelin, Dutch club tana game 103 a khelhayh goal 12 a thun a, Bayern lamah sum hmahruai euro maktaduai 18.5 nen a chhuak ta a ni.
Folarin Balogun
Monaco chuan Arsenal atangin forward Balogun hi kum nga chhung atan pound maktaduai 35-in an lei.
Kum 22 mi United States forward hian season liamta pawh khan loan-in French Ligue 1 club Reims tan a lo khel tawh a, goal 22 a thunsak nghe nghe.
Balogun hian Arsenal player a nih chhungin tun season-ah Premier League a la khel lo a, first-choice striker Gabriel Jesus inhliam mah se chhawr a hlawh lo.
Kum 17 mi a nih laiin Arsenal chuan professional inremna ziahpuiin, Gunners tan top-flight game hnih bak a khel lo.
Jesus theih loh hlanin Eddie Nketiah chuan tun season league game hmasa pahnihah bul a tan a, Inrinnia Fulham nen 2-2-a an inhnehtawk tum khan Balogun ai hian Leandro Trossard chuan duhsak a hlawh zawk bawk.
New York-a piang ni mah se a naupan laiin Balogun hi London-ah an pempui a, Arsenal academy system atanga zichhuak niin, England tan age group hrang hrangah match 13 khel tling mah se United States tan senior level-a khelh a thlang ta zawk a ni.
Carlos Baleba
Brighton chuan French side Lille atangin Cameroon-born midfielder Carlos Baleba chu kum nga chhung atan euro maktaduai 27 (£23.2m)-in an senglut.
Kum 19 mi hian thla 12 kalta mai khan a Lille debut nghakchhuakin, English club-ah hian British record thar siama Chelsea pan ta Ecuador midfielder Moises Caicedo hmunruak a luah ang.
Seagulls boss Roberto de Zerbi chuan a midfielder thar chu ‘future of the club’ tiin a sawi a; season liamta khan Lille tan league game 19 a khel tling.
Tommy Doyle
Wolves chuan season khat loan-a kawl turin midfielder Tommy Doyle chu Manchester City atangin an hruailut a, an mit a tlun chuan pound maktaduai 4.3-in an lei nghet thei ang.
Doyle hi season liamta pawh khan loan-in Sheffield United lamah a lo chhuak tawh a, Premier League lamah a kai chhohpui nghe nghe.
Nuno Tavares
Nottingham Forest pawhin loan bawkin Portuguese full-back hi Arsenal atangin an hruailut.
Kum 23 mi Tavares hian Portugal Under-21s tan game 16 khel tlingin, season khat a khel phawt ang a, Forest an lungawi a nih chuan a ngheta lei theih turin thu an dah.
Tavares hi kum 2021 khan Benfica chuan pound maktaduai riatin Arsenal hnenah an hralh a, north Londoners tan game 28 a khel tling.
Season liamta khan loan-in Marseille-ah a kal a, Ligue 1 game 31-ah goal ruk a thunsak.
Tavares hi tun nipui laia Forest player thar pasa-rihna niin, a hma deuh khan Anthony Elanga, Matt Turner, Ola Aina, Andrey Santos, Gonzalo Montiel leh Murillo an lo senglut tawh a ni.
Sergio Reguilon
Manchester United chuan loan-a Tottenham full-back lakluh an remti a, hliam avanga chawl mek Luke Shaw leh Tyrell Malacia awm loh hlana chhawr tur left-back rintlak an zawnna kawnga an chhanna pakhat a ni rih phawt.
Kum 26 mi Reguilon hian he thu buatsaih lai hian medical paltlang tawhin, naktuk zana Arsenal an luhkhung hunah Erik ten Hag-a squad luah nghal tura beisei a ni.
Reguilon hian September 2020 khan kum nga chhung atan Real Madrid atangin Tottenham a zawm a, season liamta khan loan-in Atletico Madrid tan a khel.
Dean Henderson
Crystal Palace chuan England goalkeeper hi Manchester United atangin kum nga chhung atan an lei a; kum 26 mi manah Palace hian pound maktaduai 15 an pe phawt a, pound maktaduai ngaa la pung chho leh thei turin an inrem.
Henderson hian kum 14 mi lek a nih laiin Manchester United academy a zawm a; season liamta khan Nottingham Forest tan loan-in a khel a, kumin nipui laia Palace senior player lei thar pathumna niin, Colombia midfielder Jefferson Lerma leh Brazilian forward Matheus Franca-te hnung a zui.