PM leh HM-in lawmpui State dangah State Day

Mizoram State Day pualin Prime minister Narendra Modi leh Union Home minister Amit Shah te chuan Mizoram mipui chibai an buk.
Prime minister chuan Mizote hnam ziarang danglam tak, mipui thinlung hlim leh mawi tak chu India mipuiin an chhuang, tia sawiin, Mizo mipui hnam nunphung chu midang tiphurtu, remna leh muanna kengtu a ni, tiin a sawi.
Union Home minister pawhin ram chhung hnam hrang hranga chenhonaah Mizoram chu hnam ziarang mawi tak nei a ni, tiin, hmasawnna leh changkanna kawng zawh zel turin duhsakna a hlan a ni.
Hetihlai hian state dang thenkhatah pawh larsap-te huaihawtin Mizoram State Day hi lawm a ni a. Telangana-ah chuan larsap Tamilisai Soundararajan chuan ‘Ek Bharat Shreshtha Bharat’ denchhenin Mizoram State Day lawmna Hyderabad-a a chenna, Raj Bhavan-ah a huaihawt a. Mizoram bakah Arunachal Pradesh Formation Day a nih ve tho avangin Arunachal atangin mi 7 vel leh Hyderabad Mizo mi 60 bakah Telegana sawrkara Health, Medical & Family Welfare secretary Dr Christina Z Chawngthu, IAS te nupa Dr Franklin Laltinkhuma, IAS nen sawmin thingpui ruai nen hman a ni.
Hyderabad Mizo Association-in Mizo hnam lam Cheraw an entir a, larsap hi Mizo puan Ngotekherh an hlan bawk.
Kolkata Raj Bhavan-ah pawh West Bengal larsap Dr CV Ananda Bose huaihawtin Mizoram State Day leh Arunachal Pradesh State Day lawmna hman a ni a. Kolkata-a Mizo, sawrkar hnathawka awm leh Mizo Welfare leh zirlai hruaitute an tel a ni.
Larsap hi hna tul dang avanga a awm remchan loh avangin, a adviser Dr SK Patnaik hoin hun hman a ni a. Mizoram aiawhin Mizoram House joint resident commissioner Jacob Lalawmpuia leh David Z. Chongthu, IRS ten thu an sawi. Mizoram larsap Dr Hari Babu Kambhampati hnen atanga ram pawna Mizo awmte tana State Day thuchah video clip entir a ni bawk.