PM lokal tur atan inpuahchah zel

PM lokal tur atan inpuahchah zel
September 13-a Sairang Rel Station hawnga lokal tur Prime minister Narendar Modi dawngsawng turin Mizoram sawrkar a inpuahchah zel.
Chief minister Lalduhoma kaihhruaiin Thawhlehni khan Lammuala vantlang inkhawm buatsaih dan tur ruahmanna an thlirho a. Chief secretary Khilli Ram Meena chuan September 6 thutkhawma an lo rel tawh dan leh ruahmanna siamte a sawi hmasa a, chumi hnuah mawhphurhna hrang hrang neituten an inbuatsaihna an sawifiah.
Thawhlehni vek khan Home minister K Sapdanga hoin an thukhawm bawk a. Chief secretary-in hmalakna hrang hrang a sawizau a. North Eastern Frontier Railways leh mawhphurhna nei sawrkar department aiawhte an tel.
Home minister chuan India ram state dang leh Mizoram thlunzawmna tur rel kawng hawng tura Prime minister chu a cham chhunga hun hlawkthlak tak a hman theihnan an mawhphurhna theuh tha taka hlenchhuak turin a chah.
Thutkhawmah hian Lengpui Airport, Sairang Rel Station, Thuampui Helipad leh Aizawl Lammuala venhimna, chawlh hahdamna hmun, inkalpawhna tha leh inbiakpawhna, thutna leh medical duty ruahman dan thlirho a ni a. Prime minister hmuha phochhuah tur thil hrang hrang buatsaih enho a ni bawk.
Prime minister hi September 13-ah lehlangin a lokal dawn a, a puala vantlang inkhawm hi Aizawl Lammualah buatsaih a ni ang. Bairabi- Sairang rel kawng a hawng anga, rel service thar pathum: Aizawl – Delhi Rajdhani service (Anand Vihar Terminal), Aizawl – Kolkata Express leh Aizawl – Guwahati Express a vailiam ang. Zirna in (institution) thar pahnih a hawng anga, hmalakna thar paruk lungphum a phum bawk ang.