PM Modi-an Congress sel

Prime Minister Narendra Modi chuan Congress leh an thawhpui ‘ghamandia’ alliance te chuan parliament-ah Women’s Reservation Bill chu ‘hreh takin’ an thlawp tia sawiin, hun remchang chu nei thei se an thlawp lo hrim hrim a ti zui bawk.
Inthlang mai tur Madhya Pradesh-a Bhopal khawpuia BJP worker-te punkhawmna ‘Karyakarta Mahakumb’ a thusawina a neihah Congress-te chu sawiselin, ‘thir tuiek tawh’ tia sawiin ‘urban Naxals’ ang mai niin hruaitu pawh an nei lo a ti bawk.
Congress-te chuan Madhya Pradesh chu BIMARU (hnungtawlh) ah an dah mai ang tiin a sawi.
He mega meet hi Jana Sangh co-founder Deendayal Upadhyaya piancham lawmna puala neih niin BJP-te chuan ‘Jan Ashirwad yatras’ State pum huapin an nei zui a ni.
“Congress leh an thawhpui Ghamandia bloc-te hian hreh tak chungin Women’s Reservation Bill an thlawp a, a chhan chu nari sdhakti thiltihtheihna an hriat vang a ni. Modi chu a thil tuma a hlawhtlin chian thin avanga he bill hi pass theih mai chauh a ni” tiin a sawi bawk.
Congress-te chu he bill hmeichhiate tana Parliament leh State legislature-a 33% seat pek theihna bill an sorkar laia kalpui duh lovah a puh bawk a. PM Modi chuan Congress-te chuan phurna nei tawh lovin an worker-te pawhin ngawih an chuh tawh a ti bawk.
“A hmasa berin Congress-te inthlanah hnehin an awm a, chutah an tlachhe zui a. Tunah chuan Congress-te chu contract anga leased out in an awm mek a. An policy leh slogan te aupui mahse hruaitu tena an hruai lohin an awm” tiin PM chuan a sawi bawk a. Congress-te chu outsourced-in an awm a, urban Naxals ten an contract mek a ni a ti bawk.
“Congress-te hian tun hnai kum 30 chhungin Women’s reservation bill an pass duh hauh lo va. Tunah pawh hmeichhiate an thanharh tawh avangin loh theih lohin an ban an phar ve chauh zawk a ni. Kum tam tak an sorkar chhungin eng vangin nge he bill hi an kaltlangpui loh” tiin PM Modi chuan a sawi bawk.
Rahul Gandhi pawh sawiselin silver spoon nena piang a ti bawk a. “Mi retheite nun hi an tan chuan adventure tourism, picnic niin an lo neihna hmunte chu video shooting leh photo session neih nan maia an hman a ni” tiin a sawi bawk.
“Congress rorel laiin Madhya Pradesh resource nei tha takte chu BIMARU-ah dahin BJP tena kum nga chhung lek rorelna an chan chhungin mirethei 13.5 crore an khaichhuak tawh a ni” tiin Prime Minister chuan a sawi bawk.