Jaishankar-a’n Rubio-a buaina sawipui

Jaishankar-a’n Rubio-a buaina sawipui
Indian External Affairs Minister S Jaishankar-a chuan US Secretary of State Marco Rubio a bia a. Gulf Cooperation Council (GCC) member ram palaite hmuin Asia khawthlanga buaina chhuakin India-a ei leh in, tuialhthei leh lei tihthatna kham tawk a awm theihna tura nghawng a neih dan tur ngaihtuahna seng chungin a sawipui.
Jaishankar-a hian social media-ah Rubio-a nen phone-ah an inbiak thu a tar langin, ‘Asia khawthlanga buaina leh khawvel eibar a nghawng dan bik kan sawi’ tih a tar lang a. “A bik takin energy ngah tawk a awmna tur kan sawi a, inbe zel turin kan inti,” a ti bawk.
Rubi-a nena an inbiakna leh Saudi Arabia leh United Arab Emirates (UAE) te pawh an telna, GCC ram palaite nena an inkawmna chungchangah hian sorkarin thuchhuah a siam lo va. Jaishankar-a pawhin ambassador parukte nen ‘Asia khawthlang-a buaina chhuak chungchanga ngaihdan kan inhrilh tawn’ tih chauh social media-ah a tar lang.
“He biala Indian-te tana hma an lak chhunzawm zel avangin lawmthu ka hrilh,” a ti bawk.
Jaishankar-a’n ram dang hruaitute a biak hi Cabinet Committee on Security (CCS) thukhawmin thla hmasa tawp atanga Israel leh US tangdunin Iran a beih avanga indoin eibar leh himnaa nghawng a neih dan tur an ngaihtuah tukah a ni a. CCS hian a bik takin ram chhunga ei leh in, tuialhthei leh lei tihthatna ngah tawk a awm theih nana a rang thei anga leh hun rei zawk daih tura hma lak dan tur an sawiho a ni.
Indian sorkar hian eibar leh tuialhthei bakah Asia khawthlang lam ram hrang hranga cheng Indian maktaduai 10-te tana himna a awm theih nan hma a la nasa hle bawk.
GCS ram palaite nena an inbiaknaah hian Saudi Arabia leh UAE bakah Bahrain, Oman, Kuwait leh Qatar ambassador-te pawh an tel a. Saudi Arabia leh UAE-ah ringawt pawh India mi maktaduai riat vel an cheng a ni.
Hemi hma hian Jaishankar-a hian Sri Lankan Foreign Minister Vijitha Herath a be bawk a. Social media-ah, “Asia khawthlanga buaina chhuakin nghawng a neih dan tur kan sawi dun,” a ti a. “India-in hi a thenawm ramte dah pawimawh hmasak a kalpui chu a la ngai reng,” a ti bawk.
Sri Lanka hi Asia khawthlang buaina avanga energy-a harsatna thleng mekah puia tuialhthei thawn tura New Delhi dawr mek zinga mi a ni a. India chuan heng ngennate hi an ngaihtuah mek tih a sawi a, dah that a awm leh awm loh leh ram chhunga mamawh dan an zirchian hnuah thutlukna siam a nih tur thu an sawi.
Jaishankar-a hian social media-a a tar lan dangah Pathianni zan khan German Foreign Minister Johann Wadephul-a nen pawh Asia khawthlang buaina chungchangah an inbia tih a tar lang bawk.