PM Modi-an India ‘economic powerhouse’ ni dawn ti

Prime Minister Narendra Modi chuan September 27 khan India chuan global growth engine nih a tum thu sawiin hun reilote hnuah India chu ‘economic powerhouse’ a nih tur thu a sawi bawk.
Vibrant Gujarat Summit kum 20 na lawmna neihah PM Modi chuan kum 20 kalta khan “Vibrant Gujarat” chi te reuh te chu tih niin tunah chuan thingkung lianpui a ni tawh tiin a sawi bawk.
PM Modi chuan Vibrant Gujarat chu khatih laia Central sorkar UPA in a duhsak lo em em chungin hlawhtling takin kalpui a ni tiin a sawi bawk.
“Gujarat chu India growth engine a nih theih nan Vibrant Gujarat kan huaihawt a. Khatih laia kan suangtuahna te chu ramin a takin a hmu ta a ni. Kum 2014-a ram tana thawk tura hun remchang pek ka nih khan ka tum ber chu India global growth engine a chhuah a ni” tiin PM Modi chuan a sawi bawk.
He hunah hian Gujarat Governor Acharya Devvrat, Chief Minister Bhupendra Patel leh State BJP president C.R. Patil te pawh an tel a.
“Tunah chuan global economic powerhouse India a nih mai theihna dinhmunah kan ding tawh a ni” tiin PM Modi chuan sawi bawkin, global agencies leh expert-te pawhin chutiang bawkin an sawi tiin a sawi bawk.
“Kum rei lote hnuah India chu khawvela top three economies-ah a inhlangkai ang a. Hei hi Modi-an a tiam ngam che u a ni” tiin PM Modi chuan a sawi bawk.
India rama industry-te chu India-in theihna thar a neih leh a chak zualna tur finfiah tura ngenin chungahte chuan Vibrant Gujarat chuan a thawhhlawk thei a ni tiin a sawi bawk a.
PM Modi chuan a tirah chuan Vibrant Gujarat event chu tlawmtea bultan a nih thu sawiin tunah erawh institution hrang hrang leh State tam tak ten entawnin investment summit an huaihawt ve ta reng tiin a sawi bawk.
Swami Vivekananda khan eng hna pawhin thil pathum a paltlang vek a ti a – Pakhatnaah chuan nuihsawh a tawk a, a hnuah dodalna a tawpah pawmna a bik takin a hunlai aia nasa taka sang ngaihtuahna a nih phei chuan a ni zual a ni, tiin PM Modi chuan Vibrant Gujarat-in harsatna a tawh hrang hrangte a sawi lang bawk a. Vawiinah chuan khawvelin Vibrant Gujarat hlawhtling tak a hmu tawh a ni tiin a sawi bawk a.
“Kan buatsaih tirh lai kha chuan Central sorkar chuan Gujarat development a uksak lo hle a ni. Gujarat hmasawnna atangin India development chungchang ka sawi fo thin a, mahse kahtih laia Centre-a thuneihna changtute khan Gujarat hmasawnna chu politics nen an chumchilh tlat a ni” tiin PM Modi chuan a sawi bawk.
Khatih laia Minister leh Central sorkar aiawhte chuan Vibrant Gujarat summit-a tel an duh ngai lo, tiin a sawi bawk.
“Mimal takin an tel tur thu min hrilh a, a hnuah erawh chhuanlam an siam zel a, a chhan ber pawh chunglam atanga nawrna an tawh vang a ni. Harsatna siamin an hmanhlel thin” tia sawiin foreign investor-te pawh Gujarat-a kal lo turin an nawr hial zawk tiin a sawi bawk.
“Mahse, harsatna tam tak paltlangin foreign investor-te chuan Gujarat tlawhin an tan special incentive siam a ni a. An lo kalna chhan chu sorkar tha, sorkar dik leh fel, policy ngai pawimawh sorkar leh hmasawnna inang tlang leh langtlang sorkar an duh vang a ni” tiin a sawi bawk.
Kum 2003-a Vibrant Gujarat neih hmasak ber sawiin State mipui tena amaha rinna an nghah avang chauha hlawhtling a ni a ti bawk a.
Chief Minister a nih tirhin kum 2001 ah lirnghing avanga tawrhna nasa, a hnuah khawkheng tuarin cooperative-te an tluchhe zui a ti a. A hnuah kum 2002 Godhra tragedy a thleng leh a ti bawk a.
“Khatih lai khan agenda hrang neite chuan thalai, industry leh business ten Gujarat an chhuahsan ang a, Gujarat chu tihchhiata awmin ram tan phurrit a ni ang an ti a ni” tiin PM Modi chuan a sawi bawk.
Gujarat tihhmingchhiat tumin nasa taka chetlak a ni a, khawvel huapa tihhmingchhiat tuma hmalak a ni tiin a sawi bawk.
“Gujarat chu amahin a dingchhuak tawh lo vang an ti a, crisis turu tak tak kan tawk a. Mahse, thutiam neiin heng karah hian Gujarat chu ka khaichhuak tur a ni ka ti a ni” tiin PM Modi chuan sawi bawkin chuta tan chuan Vibrant Gujarat chu pawimawh em em a ni ta a ni a ti bawk.
“Gujarat-in confidence a neih nana pawimawh niin khawvel huaisen taka a hmachhawn theihna pawimawh a ni ta a ni” tiin a sawi bawk.
Vibrant Gujarat tan a nih tirh khan foreign delegate-te tan pawh hotel lian leh tha a awm lo tiin a sawi bawk a. Kum 2009-a huaihawt a nih dawn khan a officer-te pawhin thulh mai tura an ngen thu a sawi a. Mahse, kum 2009 summit kha hlawhtlinna rahbi pawimawh a ni ta a ni a ti bawk.
Kum 2003-a a tel tlemte za chuang lek atangin tunah chuan palai 40,000 chuang an awm tawh a. Tunah chuan ram 135 atangin an kalkhawm tawh a. Kum 2003 a exhibitor 30 atangin tunah chuan 2,000 an chuang tawh a ni, tiin a sawi bawk.
“Developed ramte thawhpui tumin huaisen takin hma kan la a. State te reuh te-in developed ramte partner a neih tum ngawt kha huaisen thlak tak a ni” tiin PM Modi chuan a sawi bawk a. Mahse, ngaihdan tha leh hmathlir a dik a nih chuan system te chu lian tham takah a chhuak mai zel tiin a sawi zui bawk a.
Thil lian tham tak huaihawt dawn chuan ruahmanna tha a ngai a, engkim mai ngaihtuah leh kimchang taka chhut dip dep vek ngai a ni tiin a sawi bawk.
“One-time event atangin tunah chuan Vibrant Gujarat chu institution-ah inlet tawhin kumtluanin a kal mup mup reng a ni” tiin PM Modi chuan a sawi bawk a. A hlawhtlinna chu institutionalised a nih vang a ni a ti bawk.
Kum zabi 2- naah chuan Gujarat chu agriculture powerhouse, financial hub ni tawhin industry leh finance ecosystem nghetah a inchhuah tawh a ni, tiin PM Modi chuan a sawi bawk.
Hei mai bakah hian State pawh tihmingthain tunah chuan summit avangin Gujarat chu ideas, innovation leh industry idea tha ber ber chhuahnaa ngaih a ni tawh tiin Prime Minister chuan a sawi bawk