PM-SVANidhi Scheme hmang thate award hlan
Sawrkar laipui ruahman, PM-SVANidhi Scheme atanga kawngkama thil zuarte tana loan pek hmang tha zualte lawmpuina, Performance Recognition for Access to Financial Inclusion and Street Vendors Empowerment (PRAISE) Award chu Thawhlehni khan Aizawlah sem a ni.
PM- SVANidhi tum ber chu, Covid len laia eizawnna khaihlak, street vendors (kawngsira thil zuarte) eizawnna siamsak niin, pawisa pung tlem zawka bank (lending institution) atanga loan lak theihna a ni a; sawrkar laipui chuan 7% a pung a rulhsak a ni.
PM-SVANidhi Scheme hi Mizoramah 2020 July 1 khan bul tan a ni a, a chhawrtute chu digital payment system zirtir an nih bakah digital payment system chu an dawrah ruahmansak an ni. He scheme hnuaiah hian 1st loan Rs. 10000 niin kum khat chhunga rulh tur a ni a; 2nd loan Rs. 20000 niin kum khat leh a chanve chhunga rulh zawh tur; 3rd loan Rs. 50000 kum thum chhunga rulh zawh tur a awm a. A pung tlem leh dahkham neih ngai loin an la thei a ni.
Hemi hnuaiah Mizoramah 1st loan diltu 4025 atangin 2364 (59%) hnenah, 2nd loan diltu 340 atangin 381 (112%) leh 3rd loan diltu 100 atangin 102 (102%) pek chhuah tawh a ni.
Hmanpuitu UD&PA minister K Sapdanga chuan a department enkawlin mi harsa zawkte dawmkan nana hma a lakna leh bank hmalakna lawmawm a tih thu a sawi a. “Loan hi hmang tangkai tan chuan malsawmna hlawmhlak a ni a, hmang tangkai lo tan erawh chhiatna a ni tih hrereng ila, loan chu bank-ten min hawhtir mai a nih avangin kan eizawnna bul tan nan chauh hmang ang u,” a ti. Loan la zingah award dawng thei hial an awm chu a lawmpui thu a sawi bawk.
Best Performing ULB – Aizawl Municipal Corporation, Best Performing Lending Institutions – Mizoram Rural Bank leh State Bank of India, Best Performing Bank Branches Award-ah MRB atangin Champhai, Durtlang, Khatla, Saitual leh Vaivakawn Branch; SBI atangin Aizawl Branch, Dawrpui Branch leh In Touch hnenah PRAISE Award hi hlan a ni.
Award semna hi sawrkar laipui Ministry of Housing and Urban Affairs atangin National Mission manager Isha Trivedi chuan a rawn telpui a. PM-SVANidhi diltute hnenah sanction letter sem a nih bakah hemi hnuaia street vendors loan chungchang inhrilh a ni.