PMAY(G) thlan dan siamrem kan tum – RD minister

PMAY(G) thlan dan siamrem kan tum
– RD minister
In sak tanpuina PMAY (G) kalpui mek chu in leh lo la nei lo, tanpuina mamawh tak takte thlan an nih theihnan siamrem tum mek a ni tih Rural Development minister Prof. Lalnilawma chuan a sawi.
Thawhlehnia Khawbung RD Block din champha kum 25-na lawmna a hmanpuinaah RD minister Prof. Lalnilawma chuan, 2011 Chhiarpui behchhana in sak tanpuina PMAY(G) kalpui mek chu in leh lo la nei lo, tanpuina mamawh tak takte thlan an nih theihnan siamrem tum mek a ni a. Border Area Development Programme (BADP) chu Vibrant Village Programme (VVP) a thlak a, thiamthil tihpun (skill development) lam pawh telh tum a ni tih a sawi bawk.
Kum 2000 atangin Rural Development kaihhnawih hna hrang hrang a lo thawh tawh thin thu sawiin, heng hun chhung hian sawrkar laipui leh state sawrkar chuan thingtlangmite hmasawnna turin scheme tha tak tak a kalpui thin tih a sawi a ni.
“Khawbung RD Block-in kum 25 a lo tlin takah chuan scheme kalpui tawh leh scheme kal mek thlir chungin, kan dinhmun leh hmabak engtin nge kan kalpui ang, tih kan inzawh thar fo a tul,” Prof. Lalnilawma hian a ti.
Khawbung RD Block hi East Lungdar RD Block hnuaiah 1995 June 20 khan additional block-ah hlankai a ni a. 1999 November 26 khan Block puitlinga hlankai niin, tun thlengin addl block development officer (BDO) 2 leh BDO 16 an awm tawh. Khawbung RD Block hnuaiah hian khaw 25 an awm a, BDO hoin staff 44-in an enkawl mek.