Point 12 in Liverpool an sang fal

April 2, Nilai zan khan English Premier League khelh chhunzawm a ni a, Liverpool chuan an mualah hnehna changin an hmahruaina an tizau . Thawhleh zana hnehna chang Arsenal in hnaih hret mah se Liverpool hian point 12 in hma an hruai fal zui leh nghal a, Arsenal nen an inkar an tizau nawn leh. Nilai zan hian champion lai Manchester City pawhin hnehna an chang ve bawk.
Point 9-a hmahruai fal mek Liverpool hian an hmahruaina tihzau ngei tumin Anfield-ah Everton an mikhual. Merseyside derby hmachhawn an nih vangin an tan chak a awlsam dawn lo tih a hriat lawk. Inkhel harsa tak ni bawk mah se an mamawh point an thawkchhuak thei tho thung. Champion hnaih leh zual tura chak mamawh Liverpool hian Everton hneh ngei tumin thapui an thawh tak meuh meuh a, beisei angin goal an thun hma thei lo thung.
Inkhel hmuhnawm takah chawlhlawk hmaa goal lut a awm theih awm theih loh hnuin Reds hian chawlhlawk hnu lamah goal an thun ta thuai thung. Everton defender chetsual vangin Liverpool hian goal thun theihna hun remchang an nei a. Minute 57-naah Diogo Jota chuan goal pawimawh tak a thun a, an hmelma lian Everton lakah Reds in 1-0 in hma an hruai. Everton hian an si phurh sut tumin \an an khawh nasa hle a, hlauhawm siam zauh zauh mah se hun tawp thlengin goal an thun thei lo. Liverpool pawhin goal thun belh tum viau mah se an hlawhtling thei bik lova, thlamuang thei hauh lovin inkhel an hmachhawn tluan. Goal lut a awm belh theih loh vangin Liverpool chuan an mualah 1-0 in hnehna an chang a, point thum hlu tak an hmu.
Merseyside derby-ah point thum hlu tak an hmu hmangin Liverpool hian point 12 in hma an hruai fal a, pahnihna Arsenal nen an inkar an tizau nawn leh. Season kal mekah vawi khat chiah la tlawm Liverpool hian champion an hnaih deuh deuh zel a. EPL champion ni turin point 34 hmuh theihna la awmah point 13 chiah hmuh an ngai tawh. An elpui Arsenal in an khingpuite hneh vek pawh ni se Liverpool hian point 13 an hmuh belh leh thei a nih chuan an champion tho dawn a. Arsenal in point an hloh a nih phei chuan Reds hian champion turin point an mamawh tlem leh zual dawn. Tuna goal difference dinhmunah chuan Liverpool hian point 12 hmu belh pawh ni se an champion thei tho dawn bawk. Liverpool hi goal difference-ah +43 a ni mek a. Hetihlai hian goal difference-a Arsenal dinhmun chu +30 a ni mek a. Goal diference hi chu game khat lekah pawh a danglam dawrh thei thung. Statisticians Opta in a chhut dan chuan Liverpool hian EPL champion theihna hun \ha 99.1% zet an nei a, Arsenal in champion theihna chance an neih chu 0.9% in a chhut ve thung.
Manager thar Arne Slot hnuaiah Reds hi an che\ha chho viau a, trophy lian pathum lak beiseina lian tak an nei hman. Tunah erawh chuan EP chauh hi an champion theihna awmchhun a ni tawh a. An tan trophy lak theih hnai vai berah champion ngei tumin \an an khawh dawn. Inelna dang hmachhawn tur an nih tawh loh vangin EPL-ah an theihna zawng zawng an hlan dawn a, hei hi an hlawkpui thei viau dawn bawk.
City an chak
Nilaini zana inkhel dangah champion lai Manchester City chu an forward pawimawh Erling Haaland tel lovin an inlan a. Haaland chhawr thei lo mah se Etihad Stadium-a an mikhual Leicester City lakah si hnih faiin an chak tho thung.
Champion lai City hian an tlahniam thei dinhmuna ding mek Leicester City lakah bul an \an \ha viau a, darkar chanve hmain goal hnih an thun hman. Inkhel \an a\anga minute hnihna lekah Jack Grealish chuan hmahruaina goal a thun nghal a. Minute 29-naah Omar Marmoush chuan an goal hnihna a thun zui leh bawk a. Chawlhlawk hmaa goal hnih an thun hmanga hnehna changin point thum an hmu a, Newcastle United leh Chelsea lehpelin palina an luah lailawk. An lehpelh takte ai hian vawi khatin an khel tam zawk thung a, an dinhmun a him bik lo viau thung.
Inkhel dangah Aston Villa chuan mikhual an nihna hmunah 3-0 in hnehna an chang, an chunga awm Brihgton & Hove Albion an sawp a, table-ah an lehpel zui nghal. Villa tan hian Manchester United a\anga an hawh mek Marcus Rashford chuan minute 51-naah hmahruaina goal a thun a. Hun tawp dawn hnaih minute 78-naah Marco Asensio chuan an goal hnihna a thun a, hun pek belh minute 90+10-ah Donyell Malen chuan an goal thumna thunin an chakna a nem nghet zui leh bawk. Villa hian khelh 30 a\angin point 47 an hmu a, pa 7-naah an inhlangkai a. European competition khelh beiseina sang zawk nen hma lam an pan. Khelh hmabak tlem an la neihah thih thain an inlan ang.