Point 5 in Reds an sang fal

Point 5 in Reds an sang fal
Pathianni zan khan English Premier League 2023-24 khelh chhunzawm a ni a, Vitality Stadium-ah si li faia chak Liverpool chuan an hmahruaina an sawh nghet a, point ngain an sang fal tawh. Pathianni zana inkhel dangah Sheffield United leh West Ham United te an inhnehtawk ve thung.
Hmahruaitu Liverpool chu an hmahruaina tizau turin Vitality Stadium-ah an lenglut a, an khingpui AFC Bournemouth lakah an khel tha hle. Game thunun hneh viau mah se chawlhlawk hmain goal an thun thei lo tlat thung. Chawlhlawk hmain goal thun thei lo mah se chawlhlawk hnu lamah goal li ngawt an thun a, phu takin hnehna an chang.
Chawlhlawk hmaa goal thun thei lo Liverpool hi chawlhlawk hnu lamah tha zual zawkin an inlan a, goal an thun thuai. Second half tan atanga minute ngana lekah Darwin Nunez chuan Diago Jota siamsak atangin hmahruaina goal a thun. Goal an thun thuai vangin Jurgen Klopp a team te hi inrintawkna sang zawk nen an inlan a, goal thum an thun belh leh. Minute 70-naah goal hmahruai siamchhuaktu Jota chuan Gody Gakpo siam atangin an goal hnihna a thun. Jota hian minute 79-naah an goal thumna a thun zui leh bawk.
Si thum faia hmahruai tawh Liverpool an inthlahdah mai lova, goal thun tumin an khingpuite an nawr chhunzawm zel. Hun pek belh minute 90+3-ah hmahruaina goal thuntu Darwin Núñez chuan an goal lina a thun a, a tawp a khar zui ta a ni.
AFC Bournemouth lakah si li faia chak Liverpool hian khelh 21 atangin point 48 an hmu a, an hmahruaina an tizau. Champion lai Manchester City nen an inkarah point nga a tla zep mek a. City hian Reds aiin vawi khatin an khel tlem zawk thung. Liverpool in hma lam an pan laiin AFC Bournemouth erawh in hma lam an pan hleithei lova, 11-naah an awm chhunzawm.
Pathianni zana inkhel dangah table mawngphaha awm Sheffield United in an mikhual West Ham United lakah point an hlawhchhuak.
Sheffield United hi an mualah an tlawm leh teuh hle a, tumhnih si an phur a, hun tawp dawnah an si phurh sut hramin tlawm an pumpelh. Paruknaa awm mek West Ham tan hian Maxwel Cornet chuan minute 23-naah hmahruaina goal a thun. He goal hi Sheffield tan Ben Brereton Díaz chuan minute 44-naah a sut. Hammers hian James Ward-Prowse penalty pet goal hmangin hmahruai nawn leh mah se Oliver McBurnie chuan minute 90+11 ah penalty atangin goal pawimawh tak a thun a, an mualah harsa takin point an hmuh theih phah ta a ni