Point 6 in Arsenal an sang fal

January 3, Inrinni zan khan English Permier League 2025-26 khelh chhunzawm a ni a, AFC Bournemouth hnehtu Arsenal in table chungber an luah nghet a, Gunners hian point 6 in hma an hruai fal. Inkhelah dangah Aston Villa in an mualah hnehna an chang a, Villa hian hmasawn hretin pahnihnaah an inhlangkai a, Arsenal an um chhunzawm zel.
Gunners chakpuitu Declan Rice
An elpui lian Aston Villa an hneh vanga phur tak Arsenal hi AFC Bournemouth hmachhawn turin Vitality Stadium-ah an lenglut. Mikhual an nihna hmunah goal chhuah hmasa bawk mah se Declan Rice goal hnih thun hmangin hnehna an chang let a, point thum hlu tak hmuh belhin, table chung ber an luah nghet leh zual.
Bournemouth lakah hian tun laia defender tha ber ang hiala ngaih Grabriel Mangalhaes a chesual a, ho taka ball a pet sual vangin Bournemouth in goal an thun hmasa. Gabriel ball pek sual dawngtu Evanilson chuan minute 10-naah awlsam takin a pet goal a, hmahruaina goal a thun.
Hma taka goal an thun vangin phur viau mah se Bournemouth an phur rei lo. A tihsual siamthain Gabriel chuan minute 16-naah a pet goal a, an si phurh a sut. Gabriel hian defender ni chungin Arsenal tan goal 20 a thun tling tawh a, Arsenal defender zingah goal thun tam ber dawttu niin Laurent Koscielny chu goal hnihin a phak lo mek. Khelhna hun a la ngah vangin Gabriel hial Koscielny rescord a khum ngei a rinawm viau a, Arsenal-ah hnuhma tha zawk a hnutchhiah ngei a rinawm.
Gabriel goal thun hnu hian goal dang a luh belh mai thei tawh lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm leh zual a, Arsenal an khel tha leh zual a, goal an thun belh thuai. Gunners hian fuh zeta an khingpuite an nawr tlang a, mawi taka ball an inpek kual hnuin khel tha tak Declan Rice chuan minute 54-naah fuh takin a pet goal a, hma an hruai letna goal a thun.
Hma an hruai let hnuin Arsenal an khel tha leh zual a, bench atanga lut Saka, Trossard leh Jesus te an hnawksak leh zual. Bench atanga lut Saka hian tha taka a khalh tlang hnuin Rice tan fuh takin a chhawpsak. Player tangkai Declan Rice hian minute 71-=naah harsatna tawk lovin a pet goal a, an goal hnihna thuin, an hmahruaina a tizau. Arsenal tana goal hnih thun Declan Rice hi tlarhma leh tlarhnung thun zawm turin a thawhhlawk hle a, AFC Bournemouth lakah a khel thain a hmuhnawm hle. Tlarhnung ven leh khingpuite nawr kawnga thawhhlawk tak Rice hian Arsenal hi a champion pui a nih ngat chuan Arsenal player ropui zual zingah chhiar tel a ni reng tawh ngei ang.
Si hnih an phurh vangin hnual hman mah se Bournemouth tan Junior Kroupi chuan minute 76-naah pui zetin pet goal a, he goal hmang hian tlawm pumpelh beiseina an nei thar leh a, an mikhualte na takin an nawr chhunzawm. An dinhmun derthawng bawk thin mah se goal chhuah belh em lovin Arsenal an him thei hram a, Bournemouth lakah harsa taka hnehna changin, point thum hlu tak an hmu.
Bournemouth hnehtu Arsenal hian khelh 20 atanga point 48 hmuin hma an hruai chhunzawm zel a, champion tumin hma lam an pan zel. Gunners hian point 6 in hma an hruai fal mek a, Pathianni zanah Manchester City in Chelsea an hneh a nih chuan Gunners hmahruaina hi point 4-ah a tlahniam thung ang.
Pahnihnaah Villa
Arsenal laka an tlawm hnu lawkah Aston Villa an insiamtha nghal a, an mualah awlsam taka hnehna changin City an lehpel a, pahnihnaah an inhlangkai.
Villa hian an mualah Nottingham Forrest an mikhual a, 3-1 in hnehna an chang. Villa tan hian tan hian Ollie Watkins chuan minute 45’+1-naah hmahruaina goal a thun a, 1-0 a hmahruai chungin chawlhlawk an hmang. Chawlhlawk hnu lamah John McGinn chuan minute 49-na lekah an goal hnihna a thun zui leh bawk. 2-0 a hma an hruai laiin Nottingham Forrest tan Morgan Gibbs-White chuan minute 61-naah goal thunin an si phurh a sut then. He goal hian game a titang thar leh.
Goal an chhuah hnuin Villa in an mikhualte an nawr na zui leh nghal a, an goal hnihna thuntu John McGinn chuan minute 73-naah an goal thumna thunin, an hmahruaina a tizau nawn leh. McGinn goal thun hnu hian goal dang a luh belh thei tawh lova, Villa in an mualah point thum an hmu.
Season kal meka khel tha Villa hian khelh 20 atangin point 42 an hmu a, pahnihnaah an awm mek. City result a zirin an dinhmun hi danglam thei a la ni reng thung.