Point 7 in Arsenal an sang fal

Inrinni zan han English Premier League khelh chhunzawm a ni a, Leeds United sawptu Arsenal chuan point 7 in hma an hruai fal. Arsenal an chak rual Chelsea leh Liverpool te pawhin hnehna an chang ve bawk.
Leeds 0-4 Arsenal
Table-a hmahruaitu Arsenal hi table hnuai lama awm Leeds United hmachhawn turin Elland Road ah an lenglut. An len luhna mualah 4-0 ngawtin hnehna an chang a, United laka an tlawmna kha Leeds United lakah an hrithla a ni ber mai.
Mikhual an nihna hmunah Arsenal an khel tha viau a, chawlhlawk hma leh chawlhlawk hnu lamah goal hnih ve ve an thun. United laka che chhe tak Martín Zubime di chuan minute 27-naah hmahruaina goal a thun a. Mualneitu player Karl Darlow chuan minute 38-naah an lamah a ti-goal palh a, Arsenal goal hnihna an thunsak.
Chawlhlawk hnu lamah inkhel a hmuhnawm chhunzawm a, goal hnih dang a luh belh leh. Goal thun mamawh Viktor Gyökeres chuan minute 69-naah an goal thumna thunin an hmarhuaina a tizau a. Gyokeres thlaktu Gabriel Jesus chuan minute 86-naah fuh zeta pet goal in, an goal lina a thun a, an chakna a nemnghet.
Leeds United sawptu Arsenal hian point 7 in hma an hruai fal rih a. Pathianni zanah Aston Villa leh Manchester City te result a zirin an hmahruaina hi a danglam leh thei dawn thung. Gunners in table chung ber an luah zui zel laiin Leeds United dinhmun a chhe zual zel thung a, 17-na luah mektu Leeds United hian insiam that thuai an mamawh.
Chelsea an chak zel
Manager thar an neih ngei a, hmasawnpui tak Chelsea an chak zel a. Liam Rosenior enkawl Chelsea hian London derby-ah West Ham United an lehthal a, 3-2 a hnehna an chang a. Point thum hlu tak hmuin, pali-naah an inhlangkai lailawk.
Chelsea hian Stamford Bridge-a an mikhual West Ham lakah bul an tan tha lova, goal hnih ngawt an chhuah hmasa. 18-na luah a, chak mamawh tak Hammers tan hian Jarrod Bowen chuan inkhel tan atanga minute 7-na lekah hmahruaina goal a thun nghal. Hma takah goal an thun vangin West Ham an phur viau a, chawlhlawk dawn hnaih minute 36-naah Crysencio Summerville chuan an goal hnihna a thun belh zui leh a. Chelsea lakah si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, An si phurh sut tuma Chelsea tan khawh a hmuhnawm thei hle. Blues tan hian João Pedro chuan minute 57-naah goal thunin an si phurh a sut then. He goal hian Blues a fuih phur viau a, an khingpuite an nawr nasa hle. Chelsea tan hian defender khel tha tak Marc Cucurella chuan minute 70-naah goal thunin an si phurh a sut zo ta nge nge. 2-2 a nih hnuin boruak a sang zui viau a, hun pek belh minute 90+2-ah Enzo Fernández chuan goal pawimawh tak a thun a, Chelsea in an mikhual West Ham an lehthal a, an mualah ngei point thum hlu tak an hmu zui ta a ni. Blues hian United an lehpel lailawk a, palinaah an inhlangkai.
Inrinni zana inkel dangah Liverpool chuan 4-1 ngawtin Newcastle United an hneh ve bawk. Reds tan hian ugo Ekitike chuan goal hnih a thun a, Florian Wirtz leh Ibrahima Konaté ten goal khat ve ve an thun bawk.