Point 7 in Liverpool an sang fal

Pathianni zan khan English Premier League khelh chhunzawm a ni a, hmahruaitu Liverpool chuan an mikhual Wolves chu 2-1 in an hneh a, point sarihin Arsenal nen an inkar an tizim. Liverpool an chak lai hian Manchester United chu Tottenham Hotspurs hneh lovin an tlawm ve thung.
Arsenal laka an hmahruaina tizau leh tura chak mamawh Liverpool hian Anfield-a an mikhual Wolves an ngam hle. 17-naa awm mek Wolves hi an nawr bet nghal a, hlauhawm siam nghal mawlh mawlhin goal pawh an thun teuh thei hle. Bet tak chungin Wolves him hram thin mah se an him reng thei bik lo. Liverpool tan hian Colombia forward Luis Diaz chuan minute 15-naah hmahruaina goal a thun ta nge nge. Luiz Diaz hian khelh 10 chhung zet goal a thun loh hnuin goal a thun ve leh ta a, a phur rit a lum bo.
An mualah hmahruaina goal an thun hnuin Liverpool an khel tha zui viau a, hlauhawm an siam mawlh mawlh. Beisei angin goal thun belh thei mai lo mah se an hun tha a thleng a, penalty an hlawhchhuah. Luiz Diaz penalty hlawhchhuah chu season kal meka khel tha tluang tak Mohamed Salah chuan minute 37-naah a pet goal a, an goal hnihna a thun. Liverpool goal hnihna thuntu Salah hian EPL season kal mekah goal 23 a thun tling tawh a, top-scorer a ni mek. Salah hi EPL season kal mekah goal 37-ah a inrawlh tling tawh a. EPL-a player ropui Cristioano Ronaldo leh Harry Kane te season khatah goal-a an inrawlh tam ber record chu Salah hian a nihrual ta chiah a. Ronaldo leh Kane te tlansan theihna hun remchang tha tak a nei mek bawk. EPL-ah hian season khatah goal a inrawlh tam ber chu Alan Shearer a ni a, EPL a goal thun hnem ber ni mek Shearer hian 1994-95 season khan goal 47 ngawtah a inrawlh.
Chawlhlawk hnu lamah Liverpool hi khel tha chhunzawm bawk mah se an hmahruaina an humhim zo lo teuh viau thung. Reds hian second half tantirh lamah penalty an hlawhchhuak hman zet a. VAR hmanga ennawn a nih hnuin Liverpool in penalty an hmuh hi hnawl a ni leh ta thung. Goal an thun belh theih loh reng hnuin Wolves tan Matheus Cunha chuan minute 67-naah goal thunin an si phurh a sut then. Wolves hian hmahruaitu Liverpool lakah tlawm pumpelh tumin thapui thawh zui chiam mah se goal an thun belh thei ta lova, uiawm takin an tlawm zui ta a ni.
Wolves lakah an chak vangin Liverpool chuan Arsenal nen an inkar an tizim leh hret. Gunners nen an inkarah hian point 4 chauh tla zep hman mah se hun pawimawhah an chesual duh lova, Wolves laka point thum an hmuh hmangin Arsenal nen an inkarah point sarih a tlazep thar leh. Hmahruaitu Liverpool hian nilai zan hian Aston Villa an hmachhawn zui leh dawn a. Villa Park-ah an chak zo lo a nih chuan champion tuma inelna boruak a lian thar leh zual hle ngei ang.
Pathianni zana inkhel dangah Tottenham Hotspurs chuan minute 14-naa James Maddison goal thun hmangin team lian Manchester United n hneh a, an mualah point thum hlu tak an hmu. Season kal meka khel tha lo tak United hian Tottenham lakah an khel chhe lo viau a, goal thun theihna hun tha pawh an nei nual. Goal thun theihna hun tha nei bawk thin mah se si nghak chetha tak Guglielmo Vicaro an paltlang zo lo. Hun tawp thlengin an si phurh an sut thei lova, EPL season kal mekah a vawi 12 nan an tlawm. Tottenham lakah an tlawm leh tak vangin United hian table hnuai lam an luah nghet a, khelh 25 atanga point 29 hmuin 15-na an luah mek. United hi tlahniam thei dinhmuna ding mek Ipswich Town nen point 12 chauhin an inthlau a. Hetih lai hian hmahruaitu Liverpool nen an inthlauhna chu point 31 zet a ni tawh thung.
Team lian Manchester United an hneh vangin Tottenham hian hma an sawn hret thung a. Khelh 25 atanga point 30 hmuin, 12-na an luah mek. United laka chakna goal thuntu James Maddison khan hliam vangin a chawl deuh reng a. A dam hnuin team lian Manchester United lakah chakna goal a thun a ni a, inrintawkna sang zawk a nih phah ngei a beiseiawm.
United hian season chhe tak an hmang mek a. Manager thar Ruben Amorim hnuaiah hmasawn a hnekin hniam lam an pan zawk zel rih. An player pawimawh ni thin Ruud van Nistelrooy aia an thlan Amorim hnuaiah beisei an phak thei meuh rih lova, season chhe tak hmangin hun thimin a nang mek a ni.