Point 8 in Liverpool an sang fal

Pathianni zana English Premier League khelhah Liverpool chuan si an phurh hmasak zet hnuin Southamton an hneh let a, table-ah point 8 in hma an hruai fal. Liverpool an chak laiin manager thar Ruben Amorim hnuaia an inlan hmasak berah Manchester United an chak zo lo thung.
Table-a hmahruaitu Liverpool hi table mawngphaha awm Southampton hmachhawn turin St. Mary’s Stadium-ah an leng lut. An len luhna mualah goal thun hmasa mah se chawlhlawk hnu lamah hnufual zawkah an tang hman. Hnufual zawkah an tan hnuin Mohamed Salah goal hnih thun hmangin hnehna an chang a, point thum hlu tak an hmu. Reds chakpuitu Salah hi EPL season kal mekah goal a inrawlh tam ber a ni.
Inrinni zanah an elpui lian ber Manchester City an tlawm vangin Liverpool hian zau zawka hmahruai theihna hun tha an nei. An hun tha neih hi table mawngphaha awm Southampton lakah chhawr tangkai an tum hle a, chak ngei tumin thapui an thawh. Chak mamawh Reds tan hian Dominik Szoboszlai chuan minute 30-naah hmahruaina goal a thun. Team lian lakah goal chhuah hmasa mah se Saints an khel tha zui ta tlat thung. Saints tan hian Adam Armstrong chuan minute 42-naah goal thunin an si phurh a sut a. 1-1 a inhnehtawk chungin chawlhlawk an hmang.
Chawlhlawk hnu lamah Southampton an khel tha chhunzawm a, goal an thun leh thuai. Minute 52-na lekah Mateus Fernandes chuan Liverpool laka hma an hruai letna goal a thun. 2-1 a hma an hruai hnuin Saints hian chak tum viau mah se Liverpool er let an tuar lova, goal hnih an chhuah ta tlat thung.
Reds hian si an phurh hnuin an huaisenzia an lantir a, goal hnihin an khingpuite an chhang let. Liverpool tana khel chhe hlei thei meuh lo, mamawh chhanna ni fo thin Mohamed Salah chuan minute 65-naah goal thunin an si phurh a sut. 2-2 a nih hnuin goal lut a awm belh thei lo reng a, hun tawp dawn hnaihah Liverpool an vannei a, penalty an hlawhchhuak. He penalty hi Salah chuan minute 83-naah pet goal in, Reds chakna goal a thun. Salah goal hnihna hi Southampton in an sut thei tawh lova, an mualah hreh tak chngin an tlawm zui ta a ni.
Southampton laka an chak leh tak vangin Liverpool hian khelh 12 atanga point 31 hmuin an hmahruaina an sawh nghet. Reds hi an hnuai chiaha awm Manchester City aiin point 8 zetin an sang fal hial tawh. Manager thar Arne Slott hnuaiah Liverpool a chetha tak zet a, champion turin rin an kai sawt hle. Liverpool in an hmahruaina an tihzau laiin Southampton erawh chuan khelh 12 atangin point 4 chauh an la hmu a, table mawngphah an luah nghet ve thung.
United an chak zo lo
Pathianni zana inkhel dangah Manchester United chu manager thar Ruben Amorim hnuaiah a vawi khat nan an inlan a, an khingpui Ipswich Town lakah an chak zo lova, 1-1 in an inhnehtawk.
Table laihawl pawh luah phak hleithei lo Manchester United hi tlahniam thei dinhmuna ding mek Ipswich Town hmachhawn turin Portman Road ah an leng lut. An lenluhna mualah bul tan tha viau mah se tlawm zawkah an tang teuh hle a. Si nghak Onana chet that zarah tlawm an pumpelh thei hram chauh. Manager thar hnuai an inlan vawi khatna a nih vangin United hian ngaihven an hlawh viau a, inkhel ngaihven hlawh takah an beisei ang result erawh an hlawhchhuak zo lo thung.
Portman Road-ah United in bul an tan tha hle a, inkhel tan atanga minute hnihna lekah Marcus Rashford chuan hmahruaina goal a thun nghal der. Hma takah goal an thun vangin United an phur a, Amorim hnuaiah harhtharna an chang ngei dawn nia ngaihna lian tak a awm nghal bawk. Bul tan tha viau mah se inkhel a rei a, an khingpuite a ngam lo tulh tulh ta tlat thung.
18-naa awm mek Ipswich Town hian an si phurh sut ngei tumin tan an khawh nasa hle a, an mikhualte an nawr na viau bawk. Goal thun theihna hun tha tak an neih chu uiawm takin an hlah a, si nghak chetha tak Andre Onana an paltlang thei lo thung. Uiawm taka an hun tha neih an hlah hnu lawkah Omari Hutchinson chuan Onana dan rual loha chiangin minute 43-naah a pet goal a, an si phurh a sut ta nge nge.
Chawlhlawk hmaa goal hnih a luh hnuin chawlhlawk hnu lamah goal dang a luh belh thei tawh lo a, Ipswich Town chuan team lian United lakah point khat hlu tak an hmu ta a ni.