Mizoram Police department-a rank hrang hrang atangin kum 2020 leh 2022 chhunga chawimawina dawngtu mi 59 hnenah DGP Mizoram Anil Shukla chuan chawimawina tangkapui a hlan.
Mizorama a vawikhatna atan Ati Utkrisht Seva Padak leh Utkrisht Seva Padak chawimawina tangkapui hi Ningani khan Arya Mess, PHQ Aizawl-ah hlan a ni a. He chawimawina hi central armed police force, state/UT police force, central police organization, Assam Rifles, National Security Guards, sawrkar laipui, state leh UT hnuaia intelligence organizations, Home Guards leh India ram chhunga armed police force hrang hrang hnuaia a ngheta kum 15 (Utkrisht Seva Padak) leh kum 25 (Ati Utkrisht Seva Padak) thawk tawh, an hnathawhnaa inpekna, thiamna leh huaisenna kawnga a phute hnena sawrkar laipuia Ministry of Home Affairs-in a hlan thin a ni.
Chawimawina dawngtu zingah hian IGP (Law & Order) ni lai, Lalbiakthanga Khiangte chu DIG (Northern Range) a nih lai khan Ati Utkrisht Seva Padak 2020 hlan a ni.
Mizoram Police chuan chawimawina dawngtute an hnaa an inpekna, thawhrimna leh taimakna avangin a chhuangin a lawmpui takzet tiin thuchhuah a siam a. Hetiang dinhmuna dintir theitu an chhungte leh an thawhpuite zawng zawng inpekna leh thlawpna pawh a ngaihlu tak zet a ni.
Police 59-in chawimawina dawng
Get real time updates directly on you device, subscribe now.