Police kuta pafa thihnaah police pakua thi turin hrem

Police kuta pafa thihnaah police pakua thi turin hrem
Tamil Nadu-a Madurai district-a court chuan kum ruk kaltaa ram pum huapa thinurna thlentu, Thoothukudi district-a sumdawng, P Jayaraj leh a fapa, J Benicks te police-in an kawl laia an thihnaah police pakua chu thi tura hremna a pe.
Police pakuate hi Inspector Sridhar, Sub-Inspector Balakrishnan leh Raghu Ganesh te bakah Murugan, Samadurai, Muthuraja, Chelladurai, Thomas Francis, leh Veilumuthu te an ni.
Court chuan ‘thuneihna hman sualna thubuai’ a nih thu sawiin Tamil Nadu-ah police officer rinawm tam tak an awm tih sawiin thutlukna hian ‘police-te zingah titna a siam dawn lo’ tih a sawi.
“Pa leh fapa chu phuar beh an ni a, zahngaihna tel lovin an sawisa a… Hemi chungchang chhiar hian thinlung a tina hle,” tiin court chuan a sawi.
Thutlukna puannaah court chuan thubuai siamsak police-te nungchang hi ngun taka en fiah a nih thu a sawi a. Pa leh fapa chu ‘phuba lakna atan an phuar a, zahngaihna tel lovin an sawisa dun a ni,’ a ti.
Court chuan he thubuai hi thuneihna hman sualna chiang tak a nih thu a sawi a, ‘vantlang sum hlawh atana dawngtute tan tih tur a ni lo’ a ti a. Madras High Court-a Madurai Bench-in kalpui zel lo sela chuan ‘thu dik chu phum a ni ngei ang’ a ti bawk.
Police kuta thihna chu thil thleng ‘zen zen lo zingah pawh vâng bik’ tia sawiin CBI chuan chhuah lailawk theihna awm lovin thi tura hremna emaw, dam chhung tang tura hremna sang ber pe turin a nawr a ni.
Thubuai hi June 19, 2020-a intan a ni a, mobile shop enkawltu, Jayaraj leh Benicks te chu inkharkhip chhung khan phalna an neih aia rei an dawr hawng nia puh an nih avangin man an ni a, hei hi a hnuah thu dik lo nia hriat a ni a. An pahnih hian Sathankulam police station-ah hruai an ni a, a hnuah judicial custody-ah dah leh an ni a. Ni eng emaw zat chhungin an pahnih hian an thi a ni.
An chhungte chuan police station-ah zankhuaa sawisak an nih thu an sawi a, hliam an tuar a, an mawngah thi a put a, an taksa an khawih nasa niin an sawi.
Central Bureau of Investigation (CBI) chuan Madras High Court thupek angin state CB-CID hnen atangin chhui chianna hi a la a, thubuai kaihhnawihah hian police 10 an man a. Man zingah hian inspector pakhat, sub-inspector pahnih leh constable eng emaw zat an tel a. Officer-te lakah hian tualthah thubuai an siamsak a ni.
Chhuinaah hmeichhe constable pakhatin an pafa hi zankhuaa sawisak an nih thu leh station-a dawhkan leh lathi-ah thisen a kai thu a sawi a. Sathankulam police station-a CCTV footage tam tak tihbo a ni a, hengte hi ni tin amaha bo tura ruahman a nih vang a ni.
Kum nga chuang thubuai ngaihtuah a nih chhung hian thuhretu 100 chuang thu zawh an ni.