Police nih tum 10899 atangin 259 la Fair kan tumna kan hlen chhuak – Home minister

Mizoram Police constable-a tang tur 259 lakna atana post ruak hnawhkhah tumin mi 10899 an inlan a, a bikin hauh sak bik awm lohna, general/ unreserved-a 186 hnawhkhah tura inchuhna a na zual. Police department-ah hian constable unarmed branch (UB) ami tur 51, armed branch (AB) tur 200 leh mechanic 8 lak tum a ni a. Hna dilna thehluttu zawng zawng tan kumin March 10-26 inkar khan centre pali – Northern Range ‘A’ (3rd Bn MAP Mualpui Aizawl), Northern Range ‘B’ (5th IR Bn Lungverh Aizawl), Eastern Range (Khawzawl) leh Southern Range (Lunglei) ah physical efficiency test (PET) & physical standard test (PST) buatsaih a ni.
Hna dilna thehlut 15311 atangin 10899 an inlan a, inlan zinga 8037-in PET & PST an paltlang. Constable (mechanic) diltu tan kumin April 9-16 chhung khan mechanic demonstration/ practical test buatsaih niin, 23 an inlan a, 18-in practical test an paltlang.
Constable (UB leh AB) diltute tan May 3 khan Aizawl, Lunglei leh Khawzawl-ah written examination neih niin, diltu 7475 an inlan a, 442-in personal interview hmachhawn thei turin an paltlang. Personal interview hi May 23 atanga June 4 inkarah neiin, candidate 630 (unreserved UB & AB), hmeichhia (33% reserved), Mizoram Home Guard (10% reserved) 442, ex-Servicemen (5% reserved), mechanic 18, sportsperson (5% reserved) 170-in interview an hmachhawn a, 259 an tling.
Recruitment felfai, langtlang leh dik neih a nih theihnan Mizoram sawrkarin hetiang lama rintlak leh tawnhriat nei tha Infoclab Solutions Private Ltd Delhi ami a ruai niin Police department chuan a sawi a. Infoclab hian radio frequency identification (RFID) leh biometric identification technology hmangin PET, PST, interview leh written examination an endik. Written exam hi mithiam rawihten an endik a, optical mark recognition (OMR) system hmangin endik vek a ni tih a sawi bawk.
‘Langtlang leh felfai taka recruitment hi kalpui niin, pawnlam inrawlhna pakhatmah a awm loa, a titha apiang (merit ang chiahin) tlinga puan an ni. Tlinga puan takte hian medical test leh police verification an paltlang ala ngai dawn a ni,’ an thuchhuah chuan a ti. Medical exam hi June 10-ah neih a ni ang.
Recruitment chhung hian document lem hmang leh mi aia inlan (impersonation) man chhuah niin criminal case pali ziahluh a ni a, heng thil dikloa inhnamhnawih mi 10 man an ni tawh tih a sawi.
Police lak dana social media lama sawi awm zui chungchangah Home minister K Sapdanga chuan social media-ah vek hian chhangin, chief minister-in dik leh fel tluantling tura a duh angin chu chu tih hlawhtlin an tum a, an hlenchhuak niin an inhria tih a sawi.
A laknaa mawhphurtu police officer-te pawh zaa za in an hna lak danah an ‘fair’ tih finfiahna pawh neia an inngaih thu a sawi bawk.
Tling zat UB AB Mechanic Total
Hmeichhia (33%) 16 16
MRHG (10%) 5 12 17
Ex-Servicemen (5%) 2 4 6
Sportsperson (5%) 2 10 12
Unreserved (General) 26 174 200
Mechanic – – 8 8
Grand Total 51 200 8 259

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More