Police Patrolling
Aizawl khawpui chhunga Maubawk vengah kar kalta Zirtawpni khan vawk note vulh lai (thla khat leh a chanve) chu mi tu tih hriat loh ten a ke pathum (a ke hnunglam pahnih leh ke hmalam pakhat) an tansak a, a neituten an hmuh chuan vawk hi a lo thi tawh a. Hemi chungchang hi tunhnaiah social media lamah theh darh a ni nghe nghe.
Ruihhlo ngai an pung a, sualna pawh a pung tiin a sawi theih awm e. Vawk note thla hnih pawh la tling lo rawng taka sawisa hlum duh chu mihring rilru harhfim pangngai an ni lo ang a, zurui satliah pawh an nih a rinawm loh. Hetiang khawpa bawraw hi chu ruihhlo ngai an nih a rinawm; chutih laiin sual herh ve hrim hrim erawh awm ve theih tho chu a ni.
A enga pawh chu lo ni se, sualna a nasat tawhzia chu a takin kan hmu mek a ni a, pawisak an neih tawh loh dan aTang hian ranvulh mai piah lamah mahni mihringpuite chungah pawh rawng takin an Tuan duh mai zel ang tih a rin theih a, chuvangin kan khawlai boruak hi a ralmuang lo zual viau mai dawn tihna a ni awm e.
Hetiang huna mipuite venghim tura sawrkarin a rawih kan police-te hian zan lamah ngawrh lehzuala patrolling an kalpui hi a pawimawh dawn ta hle tih a lang ta. Thil dik lo, Tha lo, thil pawi leh tawrhna a thlen tawh hnua namen lova buai zui hrep leh si a ngaih lohna turin ‘prevention’ lam hi kan uar a pawimawh hle. Khawpui chhung hmun lun lai deuha CCTV dahte hi a That rualin, CCTV hi chu sual hnuchhuina atana hmanraw Tangkai leh pawimawh a ni mai a, hmun tam taka dah theih hi chu a Tha e; amaherawhchu, thil pawi thleng tur a dang ve thei lo. Pawisak nei lo tak tak chuan CCTV an ngai pawimawh chuang lo a, thil sual an tih avanga a hnu lama an chunga tawrhna thleng tur pawh an pawisa zo tawh lo Thin a ni a, chung mite chu ven ngai hlei hleite an ni si.
Chuvangin, thil pawi a thlen tawh hnua ‘chhui chhuah’ aiin, ‘thil pawi a thlen hmaa ‘lo venhim’ (prevention is better than cure) hi a pawimawh zawk tih hre thar nawn lehin, invenhimna lama theihtawp chhuah phawt hi kan tihtur a ni a. Darkar 24 chhung duty nei tur leh thla 13 hlawh nei tura rawih kan police-te hi zan lamah han vei suau suau mai sela, sual rawngbawl hna thawh tumte pawh an tawmim ang a, mipui pawh kan him phah nge nge ang chu!