Police Pawimawhna

Tun hnai khan Centre for Environment and Social Justice (CESJ) chuan inbiakpawhna lamah police station thuam that a tul thu chief secretary hnenah an thlen a; hemi chungchangah hian press conference an ko nghal bawk a. CESJ hmalakna rah nia ngaihbel theih turin nimin khan Mizoram police chuan hemi chungchangah hian press statement siam nghalin Mizoram chhunga police station leh police outpost biakpawh theihna mobile phone number list an tichhuak ve nghal a. Hemi rual hian Mizoram police website lamah pawh heng contact number-te hi hmuh tur a awm bawk a. CESJ lamin police station/outpost biakpawhna telephone land line number tia ansawi erawh police website lamah hian hmuh zui tur a awm ta lo niin a lang.
He thilah hian, police lam pawh hian tih fuh chiah loh an nei niin a lang a, official website lamah contact number rintlak tawh chiah lo an chhawpchhuak rei deuh niin a lang a, chutih laiin police station biak pawh theihna mobile phone number erawh fel takin a awm tho si a, hei hi mipui nawlpuiin an hriat loh avangin harsatna a thleng ta niin a lang. CESJ lam hi an thiamawm tho a, police lam pawh an dik lo a ni bik lo, engemaw ‘information gap’ a awm mai niin a lang.
Heta tanga lo lang chiang em em ta chu ‘Police Pawimawhna’ hi a ni. Police hi an pawimawh em avangin mipui ten awlsam taka an biak pawh theihna tur emergency response support system siam a ni thin a, chumi atan chuan Police biakpawh theihna nambar bik 112 siam a ni a, hei chauh hi chu, hun inangah a ruala hmang duhtu an tam chuan thil buaithlak tak a ni a, chuvangin tuna official mobile phone number hran neih ang hi tihmakmawh a ni.
A thuhrimin ERSS number 112 hi mipui nawlpui hian an hre lo thei a, khawlai hmun ualau langsar takah tar chhuah thluah hi thil tha tak a nih a rinawm bawk.
Police/traffic police-te hi mipui harsatna sukiang tur leh ram leh hnam venhim hna thawk tura mipui rawihte an ni a, mipui vin kat leh hrawk khur khur tur an ni lo a, a hming POLICE letter mal te tein kawh bik a nei hrang thliah thliah ang hian mipui rawngbawl tur an ni. Kan police-te hian an nihna hmasa ber P (Politeness) hi a nihna tur angin an phawk chhuak zo em tih hi inenfiah nan hmang fo se a duhawm hle. A tlangpuiin kan Mizoram Police-te hi an hawihhawm viau mai, mahse an zingah hian nihna hre lo, traffic police an ni emaw, mipui hrawk khur khur thin tura inngai hi an awm leh zauh thin niin a lang a. Police-te hian an pawimawhna hi an hriat chian lehzual theih nan intuaitharna (orientation) hi an neih ve fo a tha awm asin.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More