Police-te hmuhchhuah tawh Kudam-a kuhva rah dah a bo

Mizoram Police-in Vairengte chhehvel kudam an enfiahnaa Burma atanga dan loa tawlhluh kuhva rah an hmuhchhuah ho chu khawih chet tawh lo tura tih a nih hnu ah a bo then teuh nia sawi a ni.The Aizawl Post-a tarlan tawh, Vairengte chhehvela kudam, foreign kuhva dahna nia rinhlelhte chu tunhnaiah enfiah a ni a. Kudam 71-ah kuhva bag 9635 awma chhinchhiah niin, khawihche lo tura hriattir an ni. Kuhva neitu nia hriatte hi zawn chhuah mek a ni a, report kimchang sawrkara thehluh a, kalpui zel dan tur thutlukna siam thuai tura dah a ni, tiin chhuah a ni.
Kolasib district-a ramdang kuhva awmna nia rinhlelhte magistrate-ten police hruaia an dapnaah hian tualchhung kuhva chingtu pawl hruaitute pawhin an tawiawm a. Vairengte chhehvelah kudam 66, Buhchangphai chhehvelah kudam 5 an enfiah a, kudam 20 chhungah foreign kuhva hi bag 9635 a awma chhinchhiah a ni a, kudam dang 51 eawh chu a ruak tia sawi a ni bawk.
Hetihlai hian heng kuhva rah hmuhchhuah ho hi tunhnaiah a bo then nual nia sawi a ni a. Kuhva Chingtu Joint Committee – Vairengte, Bilkhawthlir, Hachhek bial-in Kolasib SP hnena FIR an thehluh danin, kumin June 26-a police nen kudama ramdang kuhva chhekkhawm dan an enfiahnaa record awm leh tuna awm chu a inang tawh lo hle a, khawihchet tawh loh tura thuneitu lamin an sawi laiin, kuhva rah dahna kudam hrang hrang atangin an phurchhuak nasa hle tih hriat a ni tih an sawi a. Phurhchhuah a nih tawh lohna’n hma laksak turin an ngen a ni.
June 26-a magistrate leh police ho nena an enfiahnaa heng kudam-a kuhva bag 9635 awm anga chhinchhiah atangin, tuna an ennawn lehnaah kudam 14 atanga kuhva bag lakchhuah hi bag 5741 a ni tih an sawi a ni.
Kuhva Chingtu Joint Committee hian heng kudama dan loa tawlhluh kuhva rah hi sawrkarin tiral turin vawiin – July 5 thleng an nghak anga, a tiral lo a nih chuan thenfai an tum tih an lo sawi lawk tawh a ni.