Police training chhuakte leh PTS principal thlah

Police training chhuakte
leh PTS principal thlah
Police Traning School Thenzawl atanga training zo police-te leh he school principal kalchhuak tur Ruatsanga Ralte chu Ningani khan thlah an ni.
Training hi kumin March 4 atanga tanin, May 22 thleng a awh. ASI (UB) pre promotion-ah mi 54 (mipa 51 leh hmeichhia 3) niin, junior under officer cadre course-ah mi 42 an ni a; harsatna awm loin an vaiin training an zo thei a ni.
PTS principal chuan training chhuakte chu an post theuhah tha taka hna an thawh loh chuan Police Training School an ti mualpho mai dawn, tiin, midang lakah an danglam zia miten hmu a, an post-ah theuh a tha zawnga danglamna thlentu ni turin a chah.
“Sawrkarin hlawh min pe a, chumi phu zo tur chuan hna thawh a tul. Police-te chu danin thuneihna leh tih tur min tuk avangin lungawi takin kan tih tur hlenchhuah a tul a, sipai nih chuan phun chungin hna kan thawk tur a ni lo,” a ti
PTS principal kalchhuak ta Ruatsanga Ralte hi senior SP Traffic Aizawl ni tura sawn a ni a. Ningani khan Thenzawl chhuahsanin Aizawl a pan nghal a ni.