Policy-a hlen zel chuan mipuiin min hnawl lo ang – ZPM vice president

An policy tha taka an hlen zel chuan ram mipuiin sawrkar turin an hnawl ngai dawn lo tih ZPM vice president Dr Kenneth Chawngliana chuan a sawi.
Thawhtannia an party office-a inkhawmah ZPM vice president chuan, policy nei thate ram mipuiin sawrkarna an siamtir thin a, an intiam anga awm leh si lo erawh an paih leh thin, tiin, “Kan policy-ah kan chiang a, hlamchhiah kan tum lo,” a ti.
ZPM sawrkar a tlak an duh loa, tlak huam erawh chuan thawh an tum tih a sawi. Mizoramah party hrang hrangin sawrkarna an siam tawh a, lal ban policy neia zalenna duh Mizo Union-in an policy tihlawhtlingin UT kan nih hnu thlengin sawrkar chak tak an din zui a. Mahse an hawi lam a dik tak loh vang nge, hmarchhaka thenawm ramten state an kai sup sup tawh laiin UT thami min zawrh a, state chu MNF rawn hawn tura kianin an tum leh policy ang an hlawhtlinpui ta loa, tlain an zuihral ta tih a sawi a ni.
PC party thangduang tak, Brig T Sailo hoa rawn dingin rambuai karah human rights an thupui a, mipui mamawh ‘Six Basic Needs’ nen hmathlir tha tak neiin ram an kaihruai a, mahse party chhungah inngeih lohna awmin ‘MNF note’ tih hial a ni a, a tawpah chuan MNF hmelmaah inchhuahin mipuiin an duhdan hawi lo zawnga kalah an ngai a. Zawi zawia ralin party dang thawhpui leh party hming thlak a ni zut a, mipuiin an tinsan tial tial a, tunah phei chuan inthlan chuh hleithei lo an ni ta tih a sawi.
Congress-in remna leh muanna aupuiin lal thutthleng ken hial an sawi a. Sawrkarna siam mah se, hmasawnna liantham hmuh tur a tam lo tih Dr Kenneth Chawngliana hian sawiin, “Intuaithar tumin policy tha tak, huapzo sawrkar din tura insawiin NLUP an duang a. An intiam angin sum sem mah se, a hlawhtlinna tak tak hmuh tur a awm lo. Tunah phei chuan party lian ber ni thin kha seat khat chauh neiin an awm a, secularism lamah tha viauin lang mah se, India ram huapah pawh development-a an chak loh avangin an hniam zel a, central leh state-ah a ngaihtuahawm hle a ni,” a ti.
MNF policy ber chu independent niin, kum 20 chhung rambuaiah min siam tih ZPM hruaitu hian a sawi. Hlawhchhama an rawn haw hnuah India sawrkar khawngaihna leh ram mipui khawngaihna zarah sawrkarna an siam a, Mizoram Intodelh Project (MIP) zuarin an hlawhchham hle a. SEDP that hmel tak, chhungtin hnenah nuai 3 pek an tiam a, ramin hma a sawnpui loh zia erawh a chiang hle tih a sawi. “An sawrkar tawp lamah phei chuan hmasawnna lam hlamchhiahin sawrkar leh dan tur ringawt an buaipui a, BJP thawhpuiah mipuiin an ngai a, vawiin thlengin NEDA atangin an la inhnukdawk lo. Inthlanah seat 10 chang mah se, hruaitu lamah an buai a, an ngaihtuahawm ta hle a ni,” a ti.
ZPM-in sawrkarna a chang ve ta a, policy enmil chungin fimkhur taka an kal a ngai tih a sawi. “Kan tum leh zawrh angte tha taka kan hlen zel a nih chuan ram mipuiin min hnawl ngai lo ang,” a ti.