Political party-te tan buh lu chuh hun

Sinlung Hills Council inthlan a hnai a, political party-te’n theihtawp an chhuah mek. Buh lu chuh hun lai a ni a, an campaign suau suau mek.
November ni 5-a vote thlak tur an ni a, campaign boruakin a vawrtawp a thleng mek. Aizawl atangin political party hruaitu lawkte’n an kal chilh a, Zoram politics-a mi langsar tak takin an riah chilh mek.
Sinlung Hills Council-ah hian seat 10 a awm a, Congress party-in party malin seat 10 an chuh. ZPM leh HPC an tang dun a, bial riatah ZPM, bial li-ah HPC an ding. MNF-in bial 10 an chuh a, bial hnihah an thawhpui HPC-R an ding.
Thu dawn danin, inthlan a hnai a, mipuiin an ngaihven telh telh. Mahse MLA inthlan te anga thawm ring chu a la ni lo.
“Campaign tirh lamah kha chuan mipui hian kan ngaihven vak lo a, mahse hei a rei telh telh a, kan ngaihven telh telh a, titi pawh a tling ve e. Amaherawhchu, MLA inthlan ang em em chu a ni rih lo,” Sakawrdai-a tlawmngai pawl hruaitu pakhat chuan a ti.
Sinlung Hills Council huam chhunga mi, inthlan lo awm tur chungchanga biakpawhte’n party hrang hrang an inbei tawk a, an phur theuh tiin an sawi a, inthlan dawn hnaih tak takah boruak a inthlak thei an ti.
Inthlan hmasak ber, 2019 inthlanah khan MNF leh an thawhpui HPC an sorkar a, bial nga ve ve an la. Indepedent ticket-in pakhat a tling a, Mizoram HPC pakhat a tling bawk.
Mahse sorkar hmasa ber hi rei vak lovah a tlu a, member thenkhat ZPM-a lut an awm avangin term kal mekah hian MNF, ZPM leh HPC te’n member an nei. Sorkar hmasa ber paih thlak a nih hnuah sorkar thar vawi thum a piang a, term hmasa berah sorkar vawi li a piang. Tuna sorkar mek hi ZPM leh HPC tang dun sorkar a ni.