Politician leh kohhran rawngbawltuten mahni tih tur kan hlen em – MBJP V/P

Mizoram siamthatna turin ram development thlenna tura rawngbawl tura inpe politician te, kohhran rawngbawl tura Pathian tana inpete hian keimahni tih tur theuh kan hlen em tih inzawh a tul tih BJP Mizoram vice president R Vanramchhuanga chuan a sawi a. Kan ram chhiat chhanah midang mawhpuh tur zawng loin, mahni kan pawimawh tih a sawi.
Thawhtannia BJP State office-a inkhawmah R Vanramchhuanga chuan ramdangin min hriat dan lawmawm tak pakhat chu ‘Nghahloh Dawr’ hi a ni a, chu chuan Mizote rinawmna a tarlang a. Nimahse chu kan rinawmna chu kan state sawrkarah te kan hmu lo niin a lang thung a, chu chu state development kan neih dan en hian a chiang, tiin a sawi.
Kristian ram inti thin mah ila, state dangte leh ramdangten min hriat lar dan nen chuan kan Kristianna chu an hmu lo nia a lan thu a sawi bawk.
Pastor-te leh rawngbawltuten pulpit tlang atangin BJP beihna leh politics chungchang an sawi foa, sawrkarna chelh apiang na tak takin an sawisel fo thin tih sawiin, “Rrawngbawltu kan tihte hian Pathianin a koh angin rawngbawlna an kalpui em, kan hna kan thawk tha em, thlarau bo Pathian hnenah kan hruai em, thlarau bo engzat chiah nge kan man tih hi zawhna lian tak, mipui thinlunga awm a ni. Mizoram siamthatna tur hian ram development thlenna tura rawngbawl tura inpe politician te, kohhran rawngbawl tura Pathian tana inpete hian keimahni tih tur theuh hi kan hlen em, kan ram chhiat chhanah hian midang mawhpuh tur zawng loin, keimahni kan pawimawh,” a ti. Mizoramah Kristian nun dik miten an hmuhna’n Pathian min koh chhan anga a thu kan awih a ngai tih a sawi.
Development tluantling kan hmuh theihna’n BJP sawrkar, development ringawt buaipuitute chu an sawrkar emaw sawrkarna fawng chelhtu ah emaw an tan a ngai tih state BJP hruaitu hian a sawi a. “BJP chu rinawm taka ram rawngbawl tur kan ni a, Mizoram hian kan chanvo dik tak kan chan theihna turin BJP Mizoram hi kan awm a ni,” a ti.
Party thenkhatin thil tak tak thleng thei lo tur, thlai thar leina tur budget-ah kan dah dawn, an tih chu mipui bumna mai a ni tih pawh sawiin, BJP chuan phuahchawp ngailoin, farmers producers organization kaltlangin farmer-te tan an thlai thar leina tur, hralhna tur leh dahthatna tur thlengin an nei tih a sawi.