Politics-a inchirhthehna tur thu dik lo an dap kual nasa – Vanlalhlana

Party thenkhat chuan politics-a inchirhthehna tur thu dik lo an dap kual nasa hle tih ZPM star campaigner, minister Vanlalhlana chuan a sawi.
Aizawl South-III bial khaw hrang hrang a fankualnaah Vanlalhlana chuan MP inthlan atan ZPM chuan mi duhawm tak leh kalphung thar rilru pu mi Pu Richard Vanlalhmangaiha an chhawp chhuak a, thlahtu atang renga ram vei mi leh mi hmingtha chhungkua an ni a, chutih mek laiin party thenkhat chuan politics-a chirhthehna tur thu dik tawk lo an dap kual nasa hle, tiin a sawi.
“Hemi atan hian mi tutute emaw mawng an hiahsak ngei niin a lang a; chutiang mite chu hmanruaah an hmang mek niin a lang. Ram tana an thil tha tih tum leh hmachhawp lam sawi uar tum si loa khingpuite beih ringawt thupuia hman hi politics ram hlui zia a ni a, mipui pawhin ngaihdan tawk kan nei thiam turah ka ngai,” a ti.
Chief minister Pu Lalduhoma kaihhruai ZPM party chuan ram rorelnaa Pathian ram tundin chu an tum a ni a, dawt leh thu puarpawleng hmanga campaign ve lo turin an party worker an ngen tih party star campaigner hian a sawi a ni.
Hachhek bial fanga chhuak ZPM hruaitu, minister Lalthansanga chuan tunlaiin an candidate chu thudik lo hmangin nasa taka beih a ni a, heng hi ngaihtuahna tibuai tham a ni loa, thudik chu a dingchang zel dawn tih a sawi.
ZPM-in mi lar candidate-a an dah chhan zawt an awm tih tih sawiin, “MP inthlan hi milar thlanna a ni loa, Parliament-a ar khuana khuan chiamin awmzia a nei lo. Mi hausa leh mithiam, inhuam em em, Delhi lama tlangnel tak takte pawh an awm. Mipui sawrkar kan nih avangin michhe ber ban phak, sawrkar thlawp tur ZPM-a mi nghet leh thawkrim hi kan ngaihtuahnaah a lian a ni,” a ti.
ZPM chuan issue base-in central-ah ring an rawlh dawn a, chutianga central sawrkar thawhpui a, a tul huna dodal turin candidate Richard Vanlalhmangaiha chu an chhawpchhuak tih a sawi a ni.