Politics khelhnan chauh Mizo nationalism an hmang – ZPM Thalai

MNF party chu politics khelhna atan chauha Mizo nationalism hmang thin an ni tih ZPM Thalai vice president Zoramchhana Sailo chuan sawiin, India hnam puanzar hnuaia tlawmna thu ziaktu MNF party chu Mizo nationalism chungchangah sawi theih engmah an nei tawh lo tih a sawi.
Thawhtannia ZPM Thalai Hqrs executive thutkhawmah Zoramchhana Sailo chuan, thangthar mithiam tak takte rawn chhuak zelin, MNF party-in politics khelhna atan chauh nationalism an duh tih hi a taka hailanin a awm zel tih a sawi a. Tunhnaia MNF Thalai vice president-in MNF chu Mizo nationalism vawng rengtu an nih thu a sawi pawh thangthar mithiamte nuih a ti za a, lu chhum ban chhum huama a taka zalenna sualtu la damte thinlung a ti na tih sawiin, ‘MNF party hi zalenna sual tak taktute phatsantu a ni,’ a ti. MNF party chu Mizo nationalism hmanga infiam tawh lo turin a chah tih a sawi.
Hnam sipaite leh an chhungte din chhuahna tur khawp MNF sawrkarin hmalakna engmah a la nei lo tih ZPM Thalai vice president hian sawiin, ‘An intiam ang ngeiin an sawrkarna term tlak hma hun tlemte an neih chhung hian hnam sipai leh an chhungte tan special scheme siam turin na takin ka phut a ni,’ a ti.