Polytechnic-a hmanraw pawimawh lak theih duh

Mizoram Polytechnic Lunglei ram chungchanga buaina kal zelah he hmunah hian zirna chhunzawm lawk theih dawna a lan loh avangin, zirlaite hmanra mamawh lakchhuah a nih theihnan hma la turin Mizo Student’s Union chuan sawrkar a ngen.
MSU Regional Hqrs. Lunglei thuchhuak chuan, Supreme Court-in Polytechnic Lunglei ram neitu hnena pek tur, ram luah man chu chawlhkar 4 chhunga High Court-a thehlut tura Mizoram sawrkar a hriattir chu lawmawm a tih thu a sawi a. Chutih laiin, High Court-a kal chhunzawm a nih dawn avangin leh MPL building pawimawh tak tak 7 kalh a la nih avangin, zirna ala khaihlak zel chu MSU chuan pawi a ti takzet tih a sawi. Building an kalh takte-ah hian an zirna atana pawimawh laboratory, workshop leh office file pawimawh a awm avangin zirlaite an khawngaihthlak tih a sawi a ni.
‘An building kalhsak atanga an mamawh zualpui lak chhuah a nih theihnan leh zirna pangngai an chhunzawm theihnan theihtawp chhuah turin Mizoram sawrkar kan ngen a ni,’ a ti.
Mizoram Polytechnic Lunglei ram luah man pek loh chungchangah, ram neitu nia insawi chuan Mizoram sawrkar a khing a, court sang zawkah kal zelin, Lunglei District Court-in ram luah man pe tura a lo tih tawh cheng nuai 88.14 chu chawlhkar li chhunga High Court hnena pe turin Supreme Court hian a rel a ni.