Pool hall-a tlanchhia beihnaah mi pakua kap hlum

Pool hall-a tlanchhia beihnaah mi pakua kap hlum
Ecuador-a police-te chuan silai kengten pool hall-ah Inrinni khan mi an kap hlum tih an sawi a, heng mite hi an tum reng vanga that ni lovin mi dang an beihnaa thi an ni tih an sawi bawk.
Playas khuaa thil thleng chhui tawh chinah a kaptute hian motorcycle-a chuang mipa pahnih an um a, pakhat zawk chu pool hall-ah hian biruk tumin a tlan lut a, um zuiin silai an hmet puak ta a, a lo awm zinga mi pakua an thi nia hriat a ni.
Tun tuma thil thleng hi mi sual pawl inhmelma kara tharum thawhna thleng thar ber niin heng mi sualte inbeihna avang hian Ecuador hi heng lai vela tualthahna thlen tam berna ram a nih phah.
Tual chhung chanchinbute chuan thi mi pakuate hi naupan lai atanga inkawm tawh, Guayas province-a tuipui kam khua, Playas-a intihlima pool khel tura kal niin an tar lang.
Police Lieutenant Colonel Gem Villacís chuan, “An inkhelh lai hian an zinga mi ni ve lo pakhat lo tel ve a awm ta a ni,” a ti.
A kaptute hi car-a chuang niin silaimu 80 vel an kap chhuak niin chhuitute chuan an sawi a. Lt-Col Villacís-a chuan an tum ber hi a tlan chhuak hlauh niin a sawi bawk.
Officer chuan mi thahte zinga mi ni lo silai kah laia lo awm ve pakhat chu thu zawh fiah turin an la tih a sawi a, tu nge a nih erawh a sawi lo.
Thi pakua zingah hian tual chhung football coach leh radio presenter fapa an tel a. Mi pahnihin hliam an tuar bawk.
Playas-ah hian emergency puan nghal niin police leh sipai dah belh a ni.
Tuipui kam a neih that avang leh khawthlir a nawm avangin Ecuadorean khualzinten Playas khua hi an tlawh nasa hle a. Guayas province hi mi sual pawlte tharum thawhna a thlen tamna ber lai a ni thung.
President Daniel Noboa-a chuan January, 2024 khan mi sual pawl lakah indo a puang a; mahse, chhutnaah chuan kumin kum tir thla nga chhung khan mi 4,000 chuang thah an ni tawh.