Pope Francis-a vui liam a ni ta

Pope Francis-a vui liam a ni ta
Pope Francis-a chu Inrinnia vui a nih hnuah Rome-ah phum a ni ta a, a vuinaah hian mi sang tel zingah ram hruaitu thahnem tak an tel.
South American pontiff hi Thawhtanni khan kum 88 mi niin a thi a, kum 12 chhung Pope a ni.
Italian khawpuia zing ni chhuak tha lo takah hian biakzin, nun leh puithiam thahnem takin Vatican panna kawng an awh tam hle.
St Peter’s Basilica panna kawng tam zawk chu khar a ni a, hei hi tlawhtute mumal zawka an kal theih nan leh venhimna thil avanga tih a ni.
Branch hrang hranga Italian police 8,000 rual bakah kang thelhtu, damdawi thiam, ui fing, mahnia inpe, sipai leh park guard rualte duty-tir an ni.
Tam tak chu Italy hmun hrang hrang atanga Rome-a chah luh an ni.
Zing dar 08:00 (India-a chawhma dar 11:30)-ah chuan square chu a khat vek tawh.
Ram hruaitu leh ram aiawha kalte chu maicham ding lamah an thu a. UK Prime Minister Keir Starmer leh French President Emmanuel Macron te pawh Vatican-ah hian hmuhtur an awm.
St Peter’s Square-ah hian rimawi ring taka tihrik a ni a. Helicopter bakah drone a tlawk kual reng bawk.
Vuina inkhawm kaihruaitu, kum 91 mi, Cardinal Giovanni Battista Re-a aw pawh ring leh chiang taka hriat theih a ni.
Inkhawm hi Catholic invui dan pangngai ang niin tawng hrang hrangin thu erawh chhiar a ni a, zai pawh Latin veka sak a ni.
St Peter’s-ah hian mi 2,00,000 vel pungkhawm anga ngaih niin Pope ruang, thinga siam mawlmang tak zawn chhuah a nih chuan thawm a ring hle.
Cardinal Re-a’n Pope hnuhma a sawi chhuah zingah Italian thliarkar, Europe-a pem tam takin harsa taka Mediterranean kâna Lampedusa thliarkar lawngchawlh hmun a tlawh hmasak ber tum te, US-Mexico ramria inkhawm a huaihawtte a tel.
“Indo hi mi tam tak thihna leh chenna in, damdawi in leh thihna thlentu a nih thu a sawi thin a. Indona hian khawvel hi a hma aia chhe zawkah a chhuah thin a, a na a, tute tan pawh a lungchhiatthlak a ni,” a ti.
Cardinal hian Pope Francis-a khan khawvel chu ‘bang siam lovin, lei dawh zawk turin’ a ti thin tih a sawi bawk.
Cardinal Re-a’n Pope kuang chu tui thianghlima a theh zawhah a then fai nan an kohhran tih danin thil a hal a. Basilica dar chu vawi thum inkhawmin kuang hi lak chhuah zui a ni.
Kuangin sqare a chhuahsan zawh hian ram hruaitu telte pawhin an thutna thawhsanin an chhuahsan ve nghal bawk.
Pope kuang hi Rome paltlangin Santa Maria Maggiore biak ina phum turin kalpui a ni a. Kalkawngah hian khawlaiah mi 1,40,000 vel intlarin Tiber lui an kân a, Rome-a hmun pawimawh tak tak – Colosseum, Forum leh Piazza Venezia-a Altare della Patria national monument an kaltlangpui.
Kuangin Santa Maria Maggiore-ah hian Pope Francis tlai dar 03:00 velah biak in sir ding lamah phum a ni a, a bul chiahah hian Virgin Mary lim a ding.
Pope vui liam a nih tak avang hian Rome khawpui leh khawvela Catholics-te chuan tu nge a aiawh dawn tih an ngaichang zui dawn a. A thlangtu tur, conclave pawh an thu thuai ang.
An thutkhawm tan hun tur hi puan la ni lo mah se ni kua an sun hun chhung, Novemdiales a liam hnu, May 5 emaw, 6 emaw a nih rin a ni.
Pope thar thlannaah hian cardinal 135 an tel dawn a, tun lai khawvela an tam ber tum niin tu nge an thlan dawn tih hriat lawk harsat ber tum a ni bawk.