Pope vui hmain St Peter’s Basilica-ah Trump leh Zelensky inbia

Pope vui hmain St Peter’s Basilica-ah Trump leh Zelensky inbia
Ukrainian President Volodymyr Zelensky leh US President Donald Trump-a te chu Inrinnia Vatican-a Pope Francis-a vui inkhawma an tel hma lawk khan an inbia a, February-a Oval Office-a an inhnial chiam hnua hmaichhana an inkawm leh hmasak ber a ni.
Thlalak darhah chuan pontiff thi ta vui tan hma lawk tak takin khun takin thil an sawi dun tih a lang.
White House chuan St Peter’s Basilica-a minute 15 chhung an inbiak chu ‘hlawk tak’ tia puangin Zelensky-a pawhin ‘chhinchhiahtlak tak la ni thei’ a nih thu a sawi bawk.
Rome a chhuahsan hnuah Trump-a hian Russian President Vladimir Putin-a bei zuiin kar hmasa tir lama Moscow-in na taka Kyiv a beih leh hnuah indo tihtawp a duh dan chu eng ang nge a nih a zawt zui.
A social media account-ah Trump-a hian ‘Putin-a’n civil mite chenna hmun missile-a kah chhan tur a nei lo’ tih a tar lang a, “Indo tihtawp hi a duh lo a ni ang tih min ngaihtuahtir a, ‘Banking’ emaw, ‘Secondary Sanctions’ emaw hmanga hrem leh a duh zawk em ni tih min ngaihtuahtir a ni?” a ti.
Zirtawpnia a palai, Steve Witkoff leh Russian president an inbiak hnuah Trump-a hian Russia leh Ukraine te chu ‘an inrem tep’ tiin a lo sawi tawh.
Trump leh Zelensky-a te Rome-a an inkawm hi February-a White House-a an inkawm tuma Trump-a’n Zelensky-a chu tanchhan tur nei lo leh Russia laka hnehna chang zo lo tur tih a hrilh hnua an inkawm leh hmasak ber a ni.
Kar liam taah pawh khan Trump-a hian Ukrainian hruaitu hi ‘engmah chhuanlam tur nei lo’ tiin a sawi leh a. Ukraine chu indona tichhuaktua puhin Zelensky-a chu muanna awmna atana inbiakna tikhawlhkhamtuah a lo puh tawh bawk.
Inrinnia an inkawm leh hnuah erawh White House chuan thil lawmawm lam a sawi a, Zelensky-a pawhin an tihlawhtling thei a nih chuan chhinchhiahtlak a tlin theih tur thu a sawi.
Ukraine Foreign Minister Andrii Sybiha-a pawhin X-ah hruaitu pahnihte inbe lai thlalak dahin, “Inbiakna pawimawhna hi thuin a sawi fiah thei lo. St. Peter’s Basilica-ah hruaitu pahnihten muanna thu an sawi dun,” a ti.
Ukrainian palai pakhatin thlalak a dahah pawh St Peter’s chhungah hian British Prime Minister Sir Keir Starmer leh France President Emmanuel Macron-a ten Zelensky-a dar an khawih lai a lang bawk.
An inbiak zawh hian Trump-a leh Zelensky-a hian basilica step zawh dunin Zelensky-a hian a thutna tur, tlar hma a thlen chuan mipuiin kut an lo beng bawk.
Vui inkhawmah hian inkar hlat lo taka thu zuiin an karah Macron-a leh ram hruaitu dangte an thu.
Ukrainian thuneitute chuan an inbe zui dawn niin an sawi a; mahse, inkhawm zawhah Trump-a hian St Peter’s chhuahsanin Rome-a a thlawhna a pan nghal thung.
Zelensky-a erawh Macron-a nen French embassy awmna, Villa Bonaparte huanah an inhmu zui a. Sir Keir pawh British ambassador chenna, Villa Wolkonsky-a hmuin EU Commission President Ursula von der Leyen nen an inkawm bawk.