Portal-a Mizo thalai tam zawk inziahluh theih dan tur sawiho

Sawrkar laipui Ministry of Youth Affairs and Sports hnuaia MyBharat portal leh thalai kaihhnawih portal danga thalai tam zawk ziahluh dan tur sawiin Ningani khan Youth Services minister Lalnghinglova Hmar hoa thutkhawm a ni. S&YS department hotute bakah Higher & Technical Education, School Education leh ICT department aiawh an tel.
Minister chuan sawrkar laipuiin portal kaltlangin thalaite tana scheme pawimawh leh tangkai tak tak a puangzar thin a. MyBharat chauh ni lo, thalai kaihhnawih hmalakna hrang hrangah kan tel ve zel a tul, tiin, Mizo thalai an inziahluh tam tawk loh avangin heng portal kaltlanga hamthatna awm theite an chân phah thin tih a sawi.
S&YS department hnuaia thalai kaihhnawih khawihtu Neva Yuva Kendra, National Service Scheme leh National Cadet Corps aiawhten Bharat portal-a registration drive an kalpui dan leh, mi tam zawk an in-register theihnana rawtna an neih an sawi a. MyBharat portal registration drive hi kumhnih vel kalpui tawh niin, khaw hrang hrangah YMA leh YLA nen thawkhoa a hmuna registration tih thin tur a ni. Zirna in, a bikin NSS unit awmna college leh school-ah mass registration drive kalpui a ni a. Registration beihpui hi October 15 thleng tur niin, tun dinhmunah Mizoram atangin mi 40000 vel an inziaklut tawh a ni.
Ministry of Youth Affairs-in India hmasawnna lamtluanga thalaite tel ve na tur platform a buatsaih ‘Viksit Bharat Young Leaders Dialogue’ a intihsiakna pakhat, quiz intihsiak chu MyBharat portal atanga inziahluh tur a ni a, Mizoram atangin mi 3498 an inziaklut tawh.