Portugal hnehtu Georgia an tlang

Germany khawpui hrang hranga khelh Euro 2024 chu nilai zan khan Group stage khelh zawh a ni ta a, last 16 lut leh last 16 lut zo ta lo a hriat kim theih ta. Nilai zana inkhelah Georgia chuan Group F champion ni chiang tawh Portugal chu si hnih faiin an hneh a, Euro an khelh hmasak berah last 16 an lut a, chanchin ngaihnawm an hnutchhiah. Group F a inkhel dangah Turkey chuan 2-1 in Czech Republic an hneh a, last 16 an lut ve bawk.
Team hmuhnawm Georgia an tlang
Euro 2024 a hmel thar awmchhun chu Georgia an ni a. Georgia hi Euro 2024 khel mek zingah FIFA Ranking a hniam ber an ni bawk. Euro a hmel thar ber hi rin aiin an huangtau teh tlat a, Turkey lakah inkhel hmuhnawm lantir bawk mah se uiawm takin an tlawm. Turkey laka an tlawm hnuin Czech Republic an hmachhawn zui a, tlawm pumpelhin point khat an hmu a, last 16 luh beiseina chhete an la nei. Last 16 luh beiseina nei bawk mah se Portugal hmachhawn zui leh tur an nih miau vangin an tan beiseina tihsan ngam erawh a ni lul lo thung.
Group champion ni chiang tawh Portugal leh Georgia te hi Arena AufSchalke-ah an inhmachhawn a, thil mak, khawvelin a rin phak ngai loh a thleng a, Georgia in si hnih fai ngawtin champion tura rinkai Portugal an hneh. Group F-ah point box tura ngaih Georgia chuan khelh thum atangin point li an hmu a, Euro an khelh hmasak berah last 16 an lut nghal ringawt. Euro an khelh hmasak berah last 16 an lut nghal hi football khawvela an thlen san ber tum, an hriat reng tawh tur a ni.
Portugal hi group champion ni chiang tawh an nih vangin an that dan berin an inlan lova, manager Roberto Martinez chuan khel tlem zawkte hun tha a siamsak a, team a siksawk nasa hle. Turkey leh Czech Republic an hmachhawn tuma bul a tantir 10 ngawt a awltir a, a hahdamtir tura ngaih ber Cristiano Ronaldo erawhin bul a tan tehtlat thung. Portugal B team hian beisei an phak lo viau a, World no 75 Georgia lakah si hnih fai ngawtin an tlawm a, am mualpho.
Team lian Portugal lakah Georgia hian beisei phak baka thain bul an tan a, goal an thun hma hle. Inkhel tan atanga minute hnihna lekah Khvicha Kvaratskhelia chuan hmahruaina goal a thun a, Portugal a barakhaih. Hma takah goal an thun vangin Georgia an phur a, inrintawkna sang zawk leh thaho zawkin an inlan zui theih phah. Hma takah goal thun bawk mah se Portugal lakah chak zui tura rin erawh an har zui viau thung a. Rinhlelhna chhum zing karah inkhel hautak an hmachhawn zui.
Criatiano Ronaldo leh a hoten an si phurh sut tumin tan an khawh a, an khingpuite an nawr na hle. Ball chang tam zawk ni bawk mah se goal thun turin ball awmze nei erawh an nei tam lo thung a, ball vawrh lut nasa mah se goal ah an hlauhawm thei meuh lo. An si phurh sut tuma tan an khawh laiin Cristiano Ronaldo chuan penalty hlawhchhuak ngei turah a inngai a, pek a ni lo thung. Hei vang hian referee a hnial zui hlak a, yellow car a hmuh phah.
Derthawng taka an hmahruaina an hum hram hram laiin Georgia an che fuh nawn leh a, penalty an hmu. He penalty hi Georges Mikautadze chuan minute 57-naah harsatna tawk lovin a pet goal a, an hmahruaina a tizau.
Si hniha hma an hruai vangin Georgia an phur a, an inringtawk viau tawh bawk. Inringtawk taka Georgia an inlan laiin Portugal an chiai a, an talbuai ve thung. An si phurh sut tum sa teh mah se hun tawp thlengin goal an thun thei lova, rin loh takin Georgia lakah an tlawm a, point 9 hmu chunga last 16 luh an tumna an tihlawhtling zo lo. Georgia lakah tlawm bawk mah se Portugal dinhmun erawh a danglam phah lova, an hmachhawn tur pawh a danglam phah lutuk lem lo bawk. Portugal hian last 16 ah Slovenia an hmachhawn zui ang a, quarter-final luh theihna hun tha tak an nei a ngaih a ni a. Georgia hian champion tura rinkai Spain an hmachhawn zui ve thung ang.
Turkey an chak, an tlang
Group F a inkhel dangah Turkey leh Czech Republic in last 16 an inchuh. Turkey hi point thum hmu tawh an nih vangin last 16 lut turin draw a tawk a. Point khat hmu tawh Czechia tan last 16 lut thei turin chak ngei ngei a ngai ve thung.
Inkhel pawimawh takah hian Czechia an vanduai a, kim lo zawka an ni thuai. Minute 20-na lekah Antonín Barák hnawhchhuah a ni. Tam zawk an nih hnuin Turkey in goal thun thei lo reng mah se Hakan Çalhanoglu chuan minute 51-naah hmahruaina goal a thun a. Cenk Tosun chuan minute 90’+4-ah an goal hnihna a thun leh bawk a, last 16 an lut zui ta a ni.