Portugal leh Spain in quarter-final an lut

Zirtawp zan khan UEFA Nations League khelh chhunzawm a ni a, Portugal leh Spain ten an khingpui an hneh a, quarter-final an lut. Portugal in an mikhual Poland an sawp laiin Spain in mualneitu Denmark an hneh ve thung.
League A, Group 1-a hmahruaitu Portugal hian Estádio do Dragão-ah Poland an mikhual a, 5-1 ngawtin hnehna an chang. Poland lakah hian Cristiano Ronaldo chuan goal hnih a thun a, goal 1000 thun tling thei turin hma lam a pan zel.
Portugal hian an mikhual Poland lakah khel tha viau mah se goal erawh an thun har hle. Chawlhlawk hmaa goal lut a awm teih loh hnuin chawlhlawk hnu lamah Portugal hian goal nga ngawt an thun ta thung. Portugal tan hian Rafael Leão chuan minute 59-naah hmahruaina goal a thun. Hmahruaina goal an thun hnuin an khel tha zui viau a, a khat mawi tawkin goal hmuh tur a awm a ni ber mai.
Rafael Leo goal thun hnuin Portugal hian penalty a hmu a, minute 72-naah Cristiano Ronaldo chuan penalty pet goal in an goal hnihna a thun. Goal 1000 thun tlin ngei tuma tan khawh mek Ronaldo hian minute 87-naah an goal lina a thun zui leh bawk. Ronaldo hian club leh ram tan goal 910 zet a thun tling tawh a, goal 1000 thung tling turin goal 90 a la mamawh. Ronaldo hi club leh ram tan goal thun hnem ber a ni mek a, goal 1000 a thun tling thei a nih ngat chuan a record khum a harsa hle ngei ang.
Rafael Leo goal khat leh Ronaldo goal hnih bakah hian Bruno Fernandes leh Pedro Neto ten Poland lakah goal khat ve ve an thun bawk. Poland tan Dominik Marczuk chuan minute 88-naah goal thun bawk mah se awmzia a nei phak tawh lo thung.
Awlsam taka hmahruaitu Portugal an chak rual hian Group 1-a pahnihnaa awm mek Croatia chu Scotland lakah an tlawm ve thung. Table mawngphaha awm mek Scotland hian Hampden Park-a an mikhual Croatia hi minute 86-naa John McGinn goal thun hmangin an hneh a, point thum hlu tak an hmu. Croatia lakah an chak vangin Scotland hi quarter-final lut thei dinhmunah an din theih phah.
Group 2-ah hian khelh 5 atanga point 13 hmuin Portugal chu group champion an ni chiang tawh. Portugal hnung zuia quarter-final lut thei dinhmunah Croatia leh Scotland an la awm. Pahnihnaa awm mek Croatia hian Portugal an hmachhawn dawn a, an mualah tlawm an pumpelh thei a nih chuan quarter-final an lut dawn a. Portugal lakah Croatia an tlawm a, Scotland in 3-0 vel tala Poland an hneh thei a nih chuan table mawngphaha awm mek Scotland hian quarter-final an luh ve daih thung ang.
Spain an tlang : Europe champion Spain chuan zirtawp zan khan Parken-ah an hnuai chiaha mi Denmark an hmachhawn a, 2-1 in hnehna an chang. Spain tan hian Mikel Oyarzabal chuan minute 15-naah hmahruaina goal a thun a. Minute 58-naah Ayoze Pérez chuan an goal hnihna a thun zui leh bawk. Quarter-final lut tura point hmuh mamawh Denmark tan hian Gustav Isaksen chuan minute 84-naah goal thunin an si phurh sut then bawk mah se hun tawp thlengin goal dang an thun belh thei lova, an si phurh an sut zo thei lo. An elpui lian Denmark lakah an chak vangin Spain hi group champion an ni chiang nghal a, quarter-final an lut.
Group 4-a inkhel dangah Switzerland leh an mikhual Serbia te chu 1-1 in an inhnehtawk ve thung. Mimualah tlawm an pumpelh vangin Serbia in quarter-final luh beiseina an nei chhunzawm zel a, Switzerland erawh chuan table mawngphah an luah chhunzawm ve thung.
Group 4-ah hian tlawm nei lova Spain in point 13 an hmu a, pahnihnaah awm Denmark in point 7 an hmu mek a, pathumnaa awm Serbia in point 5 an hmu mek bawk. Serbia hian an chungchiaha awm Denmark an mikhual zui dawn a, an mualah an chak a nih chuan quarter-final an lut ang. Hetihlai hian table mawngphaha awm mek Switzerland erawh chuan Spain an hmachhawn zui a ngai dawn thung a. Spain lakah an chak zo lo a nih chuan Swiss hi league B lamah an tlahniam ang.