Portugal ramah Barca chak zo lo teuh

Portugal ramah Barca chak zo lo teuh
Estadio do Sport Lisboa e Benfica (da Luz) inkhelah Thawhlehni zan khan tum hnih ngawt a umtu zawka tang chungin Barcelona chuan mualneitu Benfica lakah 5-4 hnehna an chang hram a, an mikhualna hmun atangin Champions League last 16 an lut fel.
|um hnih ngawt Barcelona goalkeeper Wojciech Szczesny talbuai zanah mualneitu team-in duhthusama thain inkhel bul an tan a; an thah atanga minute hnih pawh a liam hmain Greek striker Vangelis Pavlidis chuan darkar chanve lek chhunga a hat-trick siamna goal hmahruai khungin, minute 13-ah a goal hnih dang chu Polish keeper Szczesny tihsual a hlawkpui rah a ni.
Si an phurh hnu, minute 13 an khelh tlin rualin Robert Lewandowski chuan penalty atangin Spanish siphurh a sut a; 1-1 a nih hnu hian Benfica lamin goal hnih an khung belh a, he goal hnih hi Pavlidis-a tihluh ve ve niin, a hnuhnung zawk leh a hat-trick puitlinna goal chu darkar chanve khelh tlin ruala penalty atanga a chhuihluh a ni.
Catalan team hian chawlhlawk hmain an siphurh an sut zo hman lo a, half time-ah mualneitu team lamin 3-1-in hma an hruai.
Second half tir lam minute 64-ah Raphinha chuan Barca goal hnihna khung mahse minute li a kal leh tihah Ronald Araujo ‘own goal’ hmangin Portuguese club hmahruaina a chhah belh leh a, Barcelona tlawm ni herchhuak nge nge dawna ngaihna a lian hman!
Mikhual Hansi Flick-a team beilet tan minute 78-ah Lewandowski chuan penalty atang bawkin a goal hnihna leh Barca goal thumna chhuihlutin, hun pangngai tawp hma minute li chiah awm tawhah substitute defender Eric Garcia chuan mikhual team siphurh sut zawhna goal a thawh a; hun pekbelh minute rukna a kal mek laiin Raphinha chuan La Liga club chakna goal a khung zui ta a, table-a point 18 nei chungin Champions League last 16 an lut zui ta a ni.
Mipui 63,225-in a hmuna an en Lisbon khaw inkhelah hian Szczesny chetchhiatna hmuh tur awm bawk mah se ‘save’ tha tak tak a neih zingah Angel di Maria goal tur a tel a; Benfica goal-veng Anatoliy Trubin chuan hun tawp hnaih tawha Brazilian Raphinha goal a chhuah avangin goalkeeper pahnih zinga nui hnuhnung zawk chu Szczesny a ni!
Sporting forward hlui Rapinha goal hnuhnung zawk an thah leh hnu lawk, hun tawp hma siin Benfica Brazilian forward Arthur Cabral hnawhchhuah a ni.
Catalan-ho kha La Liga lama chechhe tluang lai an nih avangin Europe lamah tal chak mamawh tak an ni a; Portugal rama an talbuai em em hnuah game sarih khel zoin an group table-a pahnihna dinhmun nen round sang zawk an lut hram a; karleh Nilaini khian league stage-a match khat hmabak an la neihah Atalanta chu tlang tawh chungin an mikhual leh ang.
Nilaini zan Champions League inkhel dangah Benfica-in Juventus khelmual an lut ve bawk dawn a ni.
Belgium rama chak zo lo Juventus
Thawhlehni zan Champions League inkhel dangah Club Brugge chuan goal awm loin an mikhual Juventus an inhnehtawkpui a, Turin khaw club hian point 12 hum chungin table-ah 12-na an luah.
Belgian champion Club Brugge kha goal-ah an vanduai a, an kawtkaia point thum an hmuh zawh loh avangin point 11 nen table-ah 17-na an luah a; an league phase game hnuhnungberah January ni 29 khian Manchester City an luhkhung ang a, Juventus-in Benfica an mikhual ve thung ang.
Inkhelh banah Juve coach Thiago Motta chuan Club Brugge muala inkhelh chu eng team tan pawh a harsa em em zel tih sawi chungin mualneitu team tlarhnung khawng lutuk kha sut tlang harsa tak a nih thu a sawi a, chutih rualin, a naute pawh kha aia thaa khel thei tur an nih thu leh an tumpuite an zah mah maha a hriat thu a sawichhuak.
Tunhma lama Club Brugge nen vawili an lo intum tawhah Serie A club kha vawithum chakin, Thawhlehni zan hma chiaha an intum hnuhnunber chu Champions League tho 2005-06 group stage kha a ni.
Vawi 19 ngawt Belgian champion ni tawh Brugge kha nikum October thla nawi lama AC Milan muala 3-1-a an chak loh hnu khan inelna hrang hrangah tlawm nei loin an kal tluang mek a ni.
Dortmund barakhaihtu Bologna
Inkhel dangah Serie A club dang Bologna chuan minute hnih lek chhunga goal hnih khungin Borussia Dortmund lakah 2-1 comeback hnehna an sualchhuak a, he competition kal laia an vawikhat chakna an nghakchhuak ve ta hram!
Italy rama mikhual chan chang German-ho thung kha inelna hrang hrang belhkhawma vawili an tlawm zawnna a ni ve bawk.
Dortmund lam hian minute 15-na lekah Serhou Guirassy penalty chhuihluh hmangin hma an hruai zet a, Bologna lamin Thijs Dallinga leh Samuel Iling-Junior goal hmanga an chhanlet tak avangin kumina an match khelh tawhah Bundesliga club an la tlawm fai tluang zel a ni!
Final matchday-a Shakhtar Donetsk hmachhawn leh tur Dortmund hian point 12 neiin table-ah 13-na an luah a; round of 16 lut tur a sang zual team pariat zinga an tel pha lo a nih pawhin playoff khel tur team dang 16 zinga an tel phak loh lehzel phei chuan an coach Nuri Sahin hmalam hun a thim zual tura ngaih a ni!
Italian-ho pawh kha Thawhlehni hma chiaha an Champions league match ruk khelh atanga goal khat chiah thun thei team an ni a, an hawi champ fahran bik lo a, an kawtkaia an hnehna sualchhuah avangin point nga an khel tling a, table-ah 27-na an luah chho.
Atletico Madrid 2-1 Bayer Leverkusen
Riyadh Air Metropolitano khelmuala mipui 66,820 pungkhawm hmaah minute 25-na leka an player Pablo Barrios hnawhchhuahsak an ni chung leh si phur hmasa bawk chungin Atletico hian second half tir lam leh tawp dawna Julian Alvarez goal hnih thun hmangin hnehna an sualchhuak ta tho a; nikum nipui thawt laia Manchester City atanga ansengluh Alvarez hian inelna hranghrangah belhkhawmin Madrid club tan goal 16 a khawl tling tawh.
Minute 65 chhung zet a tlem zawk ni chunga Atletico Madrid-in hnehna an changlet thei hi a pui ve thawkhat a; chutih laiin, minute 76-ah chawlhlawk dawna Leverkusen hmahruaina goal khungtu Piero Hincapie pawh yellow card vawihnih hmuh vangin hnawhchhuah a ni ve bawk.
Atletico hi Champions League table-ah pathumna niin, Leverkusen parukna an ni a; an pahnih hian top eight luaha play-off pumpelh chunga last 16 lut thei turin dinhmun thaah an la ding zui ve ve.
An kawtkaia an hnehna sualchhuah leh tak kha Diego Simeone-a team tan inelna hrang hranga an game khelh hnuhnung vawi 17-a an tum 16 chak tlinna niin, Champions League table lamah point 15 nen pathumna an luah a, point thuma pahnihna luahtu Barcelona pha loin, hmahruaitu Liverpool lakah point rukin an hniam thung.
Game 11 chhung an chak zawn hnua tlawm Leverkusen-in point 13 hum chungin table-ah parukna an luah.

Thawhlehni zan result

Atalanta 5-0 Sturm Graz
Monaco 1-0 Aston Villa
Atletico Madrid 2-1 Bayer Leverkusen
Benfica 4-5 Barcelona
Bologna 2-1 Borussia Dortmund
Club Brugge 0-0 Juventus
Liverpool 2-1 Lille
Red Star Belgrade 2-3 PSV
Slovan Bratislava 1-3 Stuttgart