Thawhleh zan khan Portugal chuan Euro 2024 khel tura inbuatsaihnaah inkhel hnuhnung ber an hmachhawn a, an mikhual Republic of Ireland chu 3-0 in an sawp. An muala an chak tum hian Cristiano Ronaldo chuan goal hnih a thun. Inkhel dangah Ukraine chuan Moldova an sawp ve bawk.
Euro 2024-ah champion tura rinkai zinga mi Portugal hian Estádio Municipal de Aveiro-ah Republic of Ireland an hmachhawn a, darkar khat chhungin goal thum ngawt an thun hman. An mualah goal thum an thun bakah goal an chhuah loh vangin Euro-ah inrintawkna sang zawk nen an inlan theih a beiseiawm.
Portugal hian an mualah bul an tan tha viau a, inkhel tan atanga minute 18-naah João Félix, chuan hmahruaina goal a thun. Felix goal thun hmang hian si khat faia hmahruai chungin chawlhlawk an hmang. An mualah ball chang tamin, hlauhawm siam fo mah se chawlhlawk hmain goal dang an thun belh thei lo.
Chawlhlawk hnu lamah Portugal an khel tha chhunzawm a, goal hnih an thun belh. Footballer zawng zawng zingah ram tana goal thun hnem ber Cristiano Ronaldo chuan minute 50-naah an goal hnihna a thun a. Ronaldo hian minute 10 hnuah an goal thumna a thun belh zui leh bawk a, a tawp a khar.
Thawhleh zana inkhel dangah Euro khel tur Ukraine chuan inbuatsaihna tha takin an khar a, an khingpui Moldova chu 4-0 in an sawp. Ukraine tan hian Roman Yaremchuk (2), Viktor Tsygankov (43), Artem Dovbyk (49) leh Georgiy Sudakov ten goal an thun.
Portugal tan Ronaldo a vul
Get real time updates directly on you device, subscribe now.
Prev Post
Next Post