Post Malone ‘F-1 Trillion’ a No.1

Post Malone album thar ‘F-1 Trillion’ chu Billboard 200 (albums) chart No.1-ah a debut a, he chart-a Post Malone album No.1 kai thei pathumna a ni. He album hi Top Country Albums chart-ah a No.1 tel bawk a, Post Malone album he chart-a No.1 thei hmasa ber a ni ve thung.
Billboard 200 (albums) chart hi kar khat chhunga US-a album hralh tam dan atanga tehkin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘F-1 Trillion’ hi August ni 16 a tlangzarh kha niin, hla 18 a awm a, chung zinga hla 15-ah chuan Malone hian zaithiam dang a thawhpui a, chung zingah chuan Dolly Parton, Hank Williams Jr., Brad Paisley, Blake Shelton, HARDY leh Morgan Wallen te pawh an tel. He album hi a deluxe reissue ‘Long Bed’ edition pawh an tichhuak nghal a, hetah hian Post Malone solo track pakua an dah belh bawk.
F-1 Trillion album hi kar khat chhungin US-ah 2,50,000 an hralh thei a, chung zinga 1,64,000 chu streaming (on-demand official stream maktaduai 212.86) atanga album tlukpui niin, album tak tak hralh chu 80,000 a tling a, album-a hla mal hralhna atangin 6,000 a tling thei bawk.
He album hi a hla hit Billboard Hot 100 (singles) chart-ah pawh No.1 kai thei ‘I Had Some Help’ featuring Morgan Wallen awmna kha niin, May-June chhungin kar ruk a No.1 thei a, album-a hla dang ‘Pour Me a Drink’ featuring Blake Selton leh ‘Guy for That’ featuring Luke Combs te pawh tichhuak tawh a, Billboard Hot 100 chart top 20-ah an lang pha ve ve bawk.
Chappell Roan ‘The Rise and Fall of a Midwest Princess’ chu 72,000 hralh lehin No.2-ah bawk a la awm a, Taylor Swift album ‘The Tortured Poets Department’ chu he chart-a kar 15 a No.1 hnuah, 62,000 hralh lehin No.1 atangin No.3-ah a tawlh a, chart No.1 hlui bawk Morgan Wallen ‘One Thing at a Time’ chu 60,000 hralh lehin No.3 atangin No.4-ah a tawlh a, Billie Eilis ‘Hit Me Hard and Soft’ chu 53,000 hralh lehin No.4 atangin No.5-ah a tawlh ta bawk.
Zach Bryan ‘The Great American Bar Scene’ chu 44,000 hralh lehin No.5 atangin No.6-ah a tawlh a, Charli XCX ‘Brat’ chu 41,000 hralh lehin No.6 atangin No.7-ah a tawlh a, Noah Kahan ‘Stick Season’ chu 38,000 hralh lehin No.7 atangin a No.8-ah a tawlh a, chart No. 1 lui Morgan Wallen ‘Dangerous: The Double Album’ chu 36,000 hralh lehin No.8 atangin No.9-ah a tawlh a, chart No.1 hlui Zach Bryan self-titled album chu 33,000 hralh lehin No.10-ah bawk a la awm.