Post matric scho’ dawng
ve lo zirlai 4743 vel awm
Scheduled tribe zirlaite tana post matric scholarship diltu zingah Mizoramah zirlai 4743 chuan an la dawng loa, heng zingah hian an bank account-a lut tura tih fel ngai la tifel lo an awm nual a, tifel tawh erawh chuan sawrkar laipuiin sum a rawn pekchhuah hun an nghak mek.
Mizoram Scholarship Board chhinchhiah danin, academic year 2023- 2024 atana post matric scholarship for ST pekchhuah tur PFMS approve hi zirlai 31652 an ni a, 26909 pekchhuah tawh niin, 4743 pek loh a la ni. 4743-ah hian 719-in Aadhaar seeding an la ti fel loa, repush ngai 43 an awm a, tunah sawrkar laipuiin sum a pek veleh engkim tifel tawh mi 3981 hnenah scholarship hi pekchhuah theih a ni dawn.
Academic year 2023- 2024 atana central atanga scholarship atan 1st instalment hi, 2023 September 25 khan nuai 87.52 dawn a ni a; 2023 December 13-ah 2nd instalment nuai 625 dawn a ni. Scholarship chungchangah langtlang leh dik zawka kal duhna a awm avangin scholarship dilna portal hi state portal atangin national scholarship portal-a sawnluh a ni a, 1st & 2nd instalment utilization certificate nuai 712.52 hi 2024 September 19-a thehluh a ni. 2024 October 16-ah 3rd instalment atan nuai 2400 hmuh a ni a, Mizoram Scholarship Board (MSB) in chak taka hma la in, November 28-ah UC nuai 2400 thehluh a ni.
ZPM Thalai Hqrs. thuchhuak chuan, ZPM sawrkarah SMS leh UC-ah harsatna a awm loa, central atanga la dawn loh 4th installment dawn ruala SMS pek tur pawh sawrkar chuan budget a dah sa vek tih a sawi.
‘Central ministry atanga scholarship sum hmuhna, 5 year financial plan lamah kum 5 chhunga sum an sanction theih zat atangin kum 4 chhungin 90% aia tam an sanction tawh a, tun dinhmunah Mizoram leh state dang 13-in 4th installment kan la dawng lo. State 14 vanduai zingah kan tel avangin he harsatna hi Mizoram sawrkar leh MSB inthlahdah vanga hmu kim theilo niloin, central ministry-in sum a dil belh (additional grants) a hmuh phawt loh chuan state 14 tan sanction a pek theih loh avangin post matric scholarship dawng tur thenkhatin an la dawng thei lo a ni,’ a ti.
Mizoram sawrkar hmasa hunlaia state budget siam dan enletin, post-matric scholarship atan state matching share (SMS) chu budget-a dah a ni ngai loa, ZPM sawrkar chuan dah sa in, 2024- 2025 budget-ah nuai 622.28, 2025- 2026 budget-ah nuai 492.82 a dah a, sawrkar hmasa hunlai anga central sanctioned order hmuh tawh hnua SMS tur dap chawp ngai loin, Finance changtu chief minister Pu Lalduhoma leh kan Education minister Dr Vanlalthlana te hmalakna azarah SMS-ah buaina a awm ngai tawh lo tih a sawi.
Post matric scho’ dawng ve lo zirlai 4743 vel awm
Get real time updates directly on you device, subscribe now.