Power intodelh tumnaah tel turin sawm
Power intodelh tumnaah tel turin sawm
Indian Electrical and Electronics Manufacturers’ Association (IEEMA) buatsaih, North-East Power Conclave-ah Mizoram Power & Electricity minister F Rodingliana chu khualzahawm niin a tel.
Conclave hawnnaah P&E minister hian Mizoram sawrkar thil tum pawimawh ber zingah kawlphethaa intodelh a tel avangin, hlenchhuah tumin chak takin hma an la mek tih a sawi a. Mizorama hydel project leh ni zung chakna hmanga kawlphetha tam zawk thar tumnaah IEEMA member-te tel turin a sawm.
Ni zung hmanga kawlphetha siam chungchanga Mizoram sawrkar hmalak mekna sawiin, hmun hrang hrangah solar plant siamna tur ruahman a ni tawh a, a bunna tur ram a thlawna hman hawh tur a ni tih a sawi. 1st phase atan solar plant bunna tur expression of interest hmun 5 atan chhuah a ni a, IEEMA member-te tel ve turin a sawm a ni.
P&E secretary K Lalrinzuali pawhin Mizoram chu tlangram, fur ruahtui tamna hmun a nih avangin Mizoram mil tur khawl leh bungraw zangkhai leh tlo mamawhna a nasa tih a sawi a. Heng mamawhna phuhru tur leh kawlphethaa intodelh tura hmalaknaah IEEMA member-te chu thawhpuiah a sawm bawk.
Conclave-a tarlan danin, IEEMA hnuaiah hian India rama electrical leh electronic bungrua siam chhuaktu company thahnem tak an inziaklut a. Tun dinhmunah member 1200 chuang an awm mek.
Ni hnih awh NE Power Conclave-ah hian India rama electrical leh electronic bungrua siam chhuaktu langsarten an thil siam thar an pho chhuak. Hmarchhaka power sector hmasawnna tur thil pawimawh hrang hrang sawiho a ni bawk